SHILLONG: Salgro salaram jolo dingtang dingtang political dolrang, jekai National People’s Party (NPP), Tripura-ni TIPRA Motha aro uandakgipa dingtang dingtang dolrangni bakrime gital dolko bikotna manchianiara Bharatiya Janata party (BJP)-ni chalakki dakanisa ong·enga ine Congress dol matnangataha.
Iani bidingo kobor ra·timgipa manderang baksa agangrikengon, salgro salaram jolrango BJP-ni kosako chakatgipa dingtang dingtang dolrangko ma·ekatna miksonganiosa BJP, salgro salaramni dingtang dingtang dolrangko bakrime ia dolko bikotatenga ine Sombar salo, Meghalaya Pradesh Congress Committee (MPCC)-ni president Vincent Pala aganaha.
“Ian RSS aro BJP-ni chalsa ong·a. BJP-ni kosako chakatgipa dolrang, Congress aro gipin party-rangona re·angjachina gita uamangko dingtang donna gita donchakaniko tarina miksongenga,” ine Pala, RSS aro BJP-ni dilgiparang baksa agangrike iako ma·sina man·aha ine parakataha.
Salgro salaram jolo dingtang dingtang dolrangni nangrime dolko bikotna tik ka·engani gimin sing·doatengon, ia dolko bikotenggiupa dilgiparangoni bang·batan BJP-ni gitcham membor-rang ba BJP baksa bak donggipa manderangan ong·a ine Pala matnangataha.
“Uamang pilakan BJP-ni ripengrangan ong·a. Election-ni ja·manode uamang BJP-onan re·ange kamko ka·pilaigen. Ian BJP-ni chalsa ong·chongmota,” ine MPCC president aganaha.
Salgro salaram jolo dingtang dingtang dolrangni bikotna sienggipa dol aro BJP-ni gisepo maming dingtanggrikanian dongja ine parakatengon, salgro salaram jolrango songdongenggipa manderangko mikrake dongchina Pala didiataha.
“Uamangni miksongsoanirangna baten manderang seng·batna nangenga. Ian BJP-ko salgro salaram jolo mangrakatna gita chalakki dakanisa ong·enga,” ine Pala aganaha.
Ia ‘One North East’ dolko bikotani bidingo, re·anggipa November-ni 4 tariko, NPP-ni national president Conrad K Sangma, TIPRA Motha Party-ni dilgipa Pradyot Bikram Manikya, BJP-ni gitcham national spokesperson aro Nagaland a·dokni Minister Mmhonlumo Kikon aro Assam-o donggipa People’s Party-ni dilgipa Daniel Langthasa baksana dingtang dingtang dilgiparang, apsan soi ka·grimenba, New Delhi-o parakatahachim ine nikna man·a.
Ia dolko bikotani bidingo talataniko on·angengon, ian salgro salaram jolrango songdongenggipa manderangni neng·nikanirangko namatna gita dingtang dingtang political dolrangni ku·cholsan ong·aniko mesokanisan ong·aia ine a·dokni Chief Minister Conrad K Sangma parakatahachim.
“Chingni miksonganide, dingtang dingtang neng·nikanirangko namatna gita apsan ku·rangko on·na miksongani baksasa chinga ia dolko bikotaha. Ian badiaba party-ni kosako dakgrikna bikotenggipa dol ong·ja indiba salgro salaram jolni dilgiparang ong·e, salgro salaram jolrango songdongenggipa manderangni namgnina ku·cholsan bakrimaniko mesokanisan ong·aia,” ine Sangma aganaha.
