SHILLONG: State Level Youth Engagement Program-ko Mongolbar sal dipet, Sports & Youth Affairs Directorate, Shillong songjinmani NEHU Convention Hall-o ong·atenga aro ia program-ko a·dokni Chief Minister Conrad K Sangma, a·bachengate on·angaha.
Ia program-ko ong·atanio, a·dokni Sports & Youth Affairs Minister Wailadmiki Shylla aro dingtang dingtang official-rangba dongpae bak ra·angaha.
Ia State Youth Engagement Program-ko a·bachengate on·anganio a·dokni Chief Minister, chadamberangna aganprakangengon, a·dokni chadamberang, dingtang dingtang jatrangni daka rikani aro biaprangni gimin ma·sie ra·na nangchongmota ine aganenba, dingtang dingtang jat aro biapni chadamberangko gronge, uamangni daka rikanirangko skie ra·anichi chadamberangni janggi tanganio dingtanganiko ra·bana man·a ine parakataha.
Meghalaya a·dokko 10 billion economy ong·atna sorkarini nisanko done kam ka·anio chu·sokgipa ong·na gita chadamberango aro chadamberangni u·i-ma·sianirango sorkari tangka paisarangko koros ka·na gita nanga ineba Chief Minister aganaha.
Chief Minister-ni aganani gitade, bilsiprakon sak 70,000-mangni gita chadamberang, kamrangko ka·na gita re·mikkangenga aro ia chadamberangara a·dokna pattianiko ra·bagipa gam-jin gita ong·genchimoba, indita sak chadamberangna kamrangko tikate on·aniara sorkarina dal·begipa ra·biani ong·enga.
A·dokni chadamberangna sorkarini ra·gatgipa dingtang dingtang program-rang, jekai DREAM, Early Childhood Development Program, Skilling and Entrepreneurship program, CM Elevate, YESS Meghalaya, Hello Meghalaya aro uandakgipa program-rangni giminba ia tom·anio Chief Minister, agan-talate on·angaha.
Ia tom·anio, a·dokni Sports & Youth Affairs Minister Wailadmiki Shylla-ba chadamberangna aganprakangengon, iandakgipa program-rangara, a·gilsak ba a·songni gadangrangosan ong·aigija a·dokni gitaba ku·mong nangrimaniko ra·bana namen nangchongmotgipa ong·a ine parakataha.
Ia program-ko ong·atanio, gipin jatrangni daka rikani aro kamrangkosan skie ra·aigija, somoini gamchatani, ku·cholsan ong·e kam ka·ani, daitotangko ma·siani aro dilgipa ong·ani gunrangkoba skie ra·china gita Sports & Youth Affairs Minister, program-o bak ra·gipa chadamberangko didiangaha.
Ia State Level Exchange Program-o chegipa sak 24 chadamberang, Malaysia a·songona re·angna cholko man·gen aro ia program-o gnigipa ong·e chegipa chadamberang, a·songni dingtang dingtang biaprangona re·ange bak ra·eskana gita cholko man·gen ine u·iataha.
