RESUBELPARA: Batanggimin bilsirango gitan ia changoba A·we Festival-ko re·baenggipa December-ni 9 aro 10 tarikrango salgnina, North Garo Hills a·jani Resubelpara Mini Stadium-o ong·attaienga.
Ia A·we Festival-ko North Garo Hills District Administration ong·atenga aro ia festival-o dingtang dingtang program-rang, jekai kal·susaani, ma·manti bosturangko mesokani (exhibition), dingtang dingtang susaanirang, cha·ani ringanirang aro git ring·e mesokanirangkoba ong·atangna sienga.
Ia A·we Festival-ko ong·atanio, a·dokni Tourism Minister Timothy D Shira, mongsonggipa sokgipa ong·e bakko ra·angna sienga.
Ia bilsini A·we Festival-o ong·atna sienggipa program-rangara, jatni kal·susaanirang, me·asarangni volleyball, Kho-Kho, gittimrangni gisepo budu salgrikani, jakpong pe·susaani, A·chik bijakrangko song·susaani, Miss A·we Beauty Contest, A·we Dance Battle, Voice of A·we aro Rock Concert, jeon Shillong-oni Jessie Lyngdoh baksana Tura-ni Nokpante, North Wind aro Ahowee dolrang gitrangko ring·e mesokanggen.
Ia A·we Festival-ko ong·atanio dingtangmancha exhibition-koba ong·atenga, jeon sorkari department-rangna agreba, jakni dingtang dingtang kamko changgipa sapgipa manderang, jaktangchi tarigipa bosturangko mesokna aro palna sim·na gita cholrangko man·gen.
