CM, school-na gital bus gariko on·na ku·chaka
Tura: St. Xavier’s Higher Secondary School, Tura, Bristibar sal December 4 tariko bilsi 75 gapaniko maniangaha. Bilsi 1950-oni 2025-ona re·mikkangbaanio bilsi 75 gapanik o maniangaon Platinum Jubilee Souvenir-ko parakataha. School-ni campus-o maniangaha, jeon poraigipa bi·sarang, giljani dilgiparang, skigiparang aro ma·a-paarang gipinrang bakko ra·angtokaha. Tom·anio Chief Minister Conrad K Sangma mongsonggipa sokgipa ong·e bakko ra·angaha, unbaksa Tura Diocese-ni Bishop Rt. Rev. Andrew R Marak, Sister Marline Pinto, MCJ aro Sister Maria D’Silva, MCJ, Regional Directress- bakko ra·angaha.
Platinum Jubilee Souvenir-ko parakate on·angaon Chief Minister, School-ni education sector-o dal·bee on·gilaniko de·mittelaha aro Souvenir Committee-ni kragipa articles, photograph aro archival-rangko simsake seokanina mittelaha. St. Xavier-ni batanggimin bilsirangonin pangna bilsian seng·gipa student-rangko tarie Garo Hills-ni education sector-ko bilakatengani gimin de·mittelaha.
Tom·anio aganprakataon Chief Minister, Meghalaya-ni demographic-ni gimin aganangaha. A·dokni manderang jela lak 38-oni atagrik manderangde bilsi 20-ni ning·o ong·giparang ong·a. Ian dal·begipa chol ong·an baksa dal·gipa daitoba ong·a. Chadamberangko mikkangchi namgipa ramaona dilangna namen ra·biani ong·a. Uni gimin education sector-ko bilakdapatna nangenga.
Iarangni gisepon Chief Minister jatni daka-rika bewalrangko ripingna gamchataniko aganangaha. Uni gimin student-rangna Khasi aro Garo ku·sikko skie ra·na nangchongmotaniko nangnike compulsory dake donatna sorkari chanchiaha. Jatni daka-rika bewalrangko ripingna ku·tangko skie ra·aniara namen gamchata. Ia policy-ko ta·raken cabinet-o chanchirimgen.
School-na dakchakna gita Chief Minister’s Special Development Fund-oniko school-na gital gariko on·na ku·chakaha, unbaksana school-ni band-na musical instrument-rangko on·na ku·chakaha.
School-ni bilsi 75 gapaniko maniengon Bishop Andrew R Marak, Missionaries of Christ Jesus-ni Sister-rangko batanggimin bilsi 1950-oni bi·sarangna namgipa education-ko on·na dangdike on·engani gimin mittelangaha. Indake poraienggipa bi·sarangko mikkangchi nambate rakbate poraiange school-na a·dokna mikkim rasongko ra·bachina didiangaha.
Programo school-ni student-rang cultural programko ong·ate chrokmesokangaha. Pirate Dance, Wangala Dance, Ballet Dance, aro Jubilee song-ko ring·mesokangaha.
