TURA: Wildlife Trust of India (WTI) aro Garo Hills Autonomous District Council (GHADC) bakrime Dr. Reddy’s Laboratories aro World Land Trust (WLT)-ni dakchakanio Garo Hills-oni dingtang dingtang bakrangononi dam 35 baten songrangni Nokmarangna mande ra·aniko dakangaha.
West Garo hills aro Nokrek National Park aro Balpakram National Park-ni buring-bolgrimrangko ripinge rakkina WTI, batanggimin bilsi 20 somoirangonin GHADC aro State Forest Department baksa melie kam ka·enga.
Da·odipet project-o 6753 hectare-ni a·ao dam 40 Village Reserves Forest (VRF) dongako u·ina man·aha. Iarangni gisepon buring bolgrim jolrango mongmarangna rama watanikoba nirokenga. Project-ni gita hectare 600 batgipa a·ao gipanggipa buring-bolgrimrangko simsakgija galchipe dongipakoba nirok-simsakenga.
“VRFs-ko rakkina ba donna gita Nokma aro uamangni ma·kringrang an·tangtangni A·kingni biaprangko on·enba namgipa kamrangko ka·enga. An·tangtangni a·king-chigako ripinge uamang biodiversity-ko chelchakengan baksa mikkangchi an·tangtangni dedrang-su·drangna uamangni a·a aro buring bolgrimrangko ripinge rakkienga.
In recognition of their contribution to nature conservation, a felicitation event was organized at SMELC building in Tura.
Tom·aniko GHADC-ni EM Forest and Environment HR Sangma dilangaha. WTI-ni Trustee Emeritus Prof. P.C Bhattacharjee, CFO-ni Joint Secretary Rangkhu Sangma, GHADC-ni Joint Secretary PR Marak, WTI-ni Chief of Conservation aro Vice President Dr. Sandeep Kumar Tiwari- uamang bakko ra·angaha.
Garo Green Spine Conservation project-ara conservation model ong·a aro global-ni gamchatgipa topic ong·a, WTI-ni a·sel iandakgipa chu·sokanirangko man·aha, unbaksana chu·sokanio Nokma aro jolni dilgiparangni dal·bea on·gilanirang donga ine Prof P.C.Bhattacharjee aganaha.
Iarangni gisepon songni Nokmarangba a·kingko ripinge rakkiani bidingo chagronggipa neng·nikarangko aganangaha aro buring-bolgrimko ripinge rakkianio WTI aro GHADC-ni dakchakanina mittelangaha.
HR Sangma, Nokmarangko mikkangchiba buring-bolgrimko ripinge rakkiangna aro do·o-matrang, aro buringo donggipa jonturangko ripingna bang·bate VRF-ko bikotchina didiangaha.
Iarangni gisepon batanggimin bilsi 23 somoirangonin Garo Hills-ni biodiversity-ko ripinge rakkina dakchakengan gimin GHADC, WTI-ko de·mittela mande ra·angna certificate-ko on·aha.
Tom·anio mikkangchi buring-bolgrimrangko aro uo dongpagipa do·o-matrang, pulrang aro gimik dakgipa rokomni jonturangko ripinge rakkina resolution-ko tarienba ku·mikchetangaha.
Selbalgre-ni Nokma Kremith Sangma, WTI-ni kamrangko de·mittelaha. Uamangoni songona da·ode buring-bolgrimrangko ripinge rakkiengani gimin matchok, hurorang re·bapilengaha aro tipanggipa chiring-chibisikrangba tangpilengjok ine aganaha.
