TURA: East Garo Hills Rongjeng-ni dingtang dingtang dolrang bakrime Gabil Daningka RMSA School-ni Headmaster-ko kamtangna simsakja aro ong·gija kamrangko ka·a ine matnangaha. APA, NGCO aro gipinrang, school-ni headmaster-ni kosako badi ka·doangaha.
Williamnagar-ni DSEO-na badi ka·anio headmaster-ko SMC-na u·aitgija NIOS centre-ko chalaienga, ian SMC-ni kosako re·e kam ka·ani ong·a. Unbaksana school-ni tangka paisarangko jakkalsretan baksana SMC tom·aniko ong·atjaenga. Admission fee-na agreba dingtang dingtang fee-rangko janape tangka ra·enga ine matnangaha.
Iarangko janape school-ni headmaster-ko ta·raken uni post-oniko ra·galchina dabie uni kosako ja·kku de·china dabiangaha.
