SHILLONG: Mikkang bilsio maming neng·nikarang sokja ong·ode Assam Chaparmukh Junction-oni Meghalaya Jowai-ona railway line-ko ra·bana miksonge North East Frontier Railway, survey ka·na a·bachengatnaba donga.
Chaparmukh-oni Jowai-ona railway line-ko ra·baskana meja bilsini financial year-o sanction ka·aha indiba survey ka·na gita somoikode tik ka·kujaenga ine NFR aganaha.
“Maming golmal dongjaode mikkang bilsioni survey ka·aniko a·bachengnaba gnang ine railway-oni officer koborna u·iataha.
Niatgenchimode Meghalaya-ni pressure group-rang railway-ko a·dokona ra·baode niamgri napsrukbagiparang batnaba donga ine kene jegalsoenga, jeni a·sel da·o dipet Khasi Hills-ona railway line-ko ra·bana man·kujaenga.
Ia proposal-ko ra·chakanga ong·ode preliminary survey-ni ja·man final survey-ko joljol dakangskagen.
“Survey ka·a matchotahaon DPR-ko tarigen aro tangkarangko chamgen. Indiba Meghalaya-o railway-na survey ka·na gita somoi nangnaba donga.
Ra·bana miksongenggipa railway route-o bang·a jolrang napgen, jekai Bhoksong, Rajagaon, Baithalangso, Jengkha, Kherani aro Umrangso nape Jowai-ona sokanggen.
Meghalaya-ni pressure group-rang a·dokona railway-ko ra·bana skang ILP-ko donchina dabienga. A·dok sorkari, stakeholder-rang baksa agangrikna ja·ku de·engachim indiba da·odipet agangrikna man·kujaenga.
