EJH-o niam gri koela bikotaniko champengchina Katakey Committee u·iata

SHILLONG: East Jaintia Hills a·jao niam gri koela bikotaniko champengna gita ge·etaniko on·china Justice (Retd) BP Katakey Committee, a·dokni Chief Secretary-na u·iataha.
Badia biaprango niam gri koelarangko bikotenga, uandakgipa biaprangko sandienba, re·rurae nirok sandianiko bariatchina gitaba ia Committee, East Jaintia Hills a·jani Deputy Commissioner aro Superintendent of Police (SP)-na ge·etaniko on·angaha.
East Jaintia Hills a·jani Lumbangla songo niam gri koelarangko bikotenga ine adita salrangna skang, Mawlai-ni Voice of the People’s Party (VPP) MLA Brightstarwell Marbaniang badi ka·doangani ja·man, ia jolrango niam gri koela bikotaniko champengchina Katakey Committee u·iataha.
Meghalaya High Court-na on·anggipa 34-gipa interim report-o Justice BP Kataket Committee-ni u·iatani gitade, 2014 bilsio National Green Tribunal aro 2019 bilsio Supreme Court-ba niam gri koela bikotaniko champengchina gita ge·etaniko on·ahaoba, East Jaintia Hills a·jao aro Lumbangla songo niam gri koela bikotaniko champengna gita East Jaintia Hills a·jani District Administration aro police-rang, maming ja·kurangko de·jaengani a·selan niam gri koela bikotanirang batroroenga.
Ia jolrango niam gri bikotgipa koelarangko gipin biaprangona salangna man·jana gita mikrakbate nirokchina gitaba Katakey Committee, East Jaintia Hills a·jani DC aro SP-na ge·etaniko on·angaha.
Niam gri koela bikotaniko champengna gita mai dakgipa ja·kurangko de·aha, iani bidingo jaantian Chief Secretary-na ba Additional Chief Secretary-na komigijagipa official-rangna report-ko on·china gitaba Katakey Committee, East Jaintia Hills a·jani Deputy Commissioner aro SP-na ge·etaniko on·angaha.
“East Jaintia Hills a·jao niam gri koela bikotaniko chu·gimik champengna man·na gita a·dokni Chief Secretary/Additional Chief Secretary, nanga gita ge·etanirangko on·jringgen,” ine Katakey Committee-ni 34-gipa report-o parakataha.
Katakey Committee-ni report-o janapani gitade, Lumbangla songo niam gri koela bikotani bidingo FIR-ko 2025 bilsini September 28 tarikon man·soaha indiba case-ko October 6 tarikosa, Khliehriat Police Station-ni officer-in-charge register ka·aha.