Bilsi 17-ni ja·man GSWSS-ko March jao matchotna ka·dongenga: Marcuise

SHILLONG: Bilsi 17-na ja·manchakatako man·ani ja·man da·o bon·kame, Greater Shillong Water Supply Scheme (GSWSS)-ko re·baenggipa 2026 bilsini March jao matchotna nisanko donaha ine a·dokni PHE Minister Marcuise N Marak parakataha.
Marak-ni aganani gitade, ia Water Supply Scheme-ko 2008 bilsio sanction ka·chengaonin dingtang dingtang a·selrangchi ja·manchakatako man·ahani gimin kamrang matchotningna man·jaha.
Ia Water Supply Scheme-na gipin kamrangkode porikka ra·e nimanaha aro da·o chi sualani kamrangko chu·gimik matchotahaode, kamrangko a·bachengna man·gnok ineba Marak parakataha.
“Uni gimin chi sualani kamrang matchotahaode chinga ia project-ko 2026 bilsini March jaode chu·gimik a·bachengna man·na gita ka·dongenga,” ine Marak aganaha.
Maini a·sel ia Water Supply Scheme bilsi 17-na matchotchipgija dongna nangaha, iani bidingo talataniko on·angengon, dingtang dingtang a·selrangchi kam ka·anio champengatako man·aha aro ia neng·nikanirangko PHE department, ka·sinsinsa namatna man·aha ine PHE Minister parakataha.
“A·selrangko niatgenchimode, buring bolgrimrang, ramarang aro cantonment area-koba ra·sotna nange, permission-ko ra·na nangaha. Chinga Hima Mawphlang baksaba neng·nikanirangko chagrongna nangaha. Neng·nikanirang, mingsani ja·man mingsa dake sokbarikrikaha aro chinga ia neng·nikanirangko namatna somoirangko nangaha,” ine Marak aganaha.
Ia water supply scheme-ni kamrango dingtang dingtang department-rang aro dal·dalgipa official-rang, jak on·paahani a·selsa da·o kamrang chu·sokgipa ong·na man·aha ineba ua aganaha.
“Ia kamni chu·sokanio chief minister-oni chief secretary, chief engineer-rang aro pilakan gisiko nangbee kamko ka·aha aro iani a·selsa da·o kamrang matchotna man·engaha,” ine Marak aganaha.
Tura songjinmana chirang chu·ongrongjaengani gimin janapatengon, chi chu·onggijaniko namatna gita PHE department, dingtang dingtang cholrangko ra·gatenga ine PHE Minister parakataha.
“Iani bidingo Chief Minister an·tangan ja·kurangko de·e, Tura songjinmani mitam biaprangna chirangko sokate on·na gita dal·begipa water supply scheme-ko a·bachengataha aro unbaksana Greater Tura Water Supply Scheme-koba a·bachengataha,” ine Marak aganaha.
Ia project-rang matchotahaode, Tura songjinmani manderang chu·onga gitan chirangko man·gnok ine PHE Minister, an·tangni ka·dongchakenganiko parakataha.