TURA: HQ 101 Area, Assam Regiment Centre aro Sainik Welfare Directorate, Tikrikilla, Garobadha, Tura aro Ampati-ni Ex-Servicemen Association-rangni dakchakanichi, Sombar saloni a·bachenge salgnina Ex-Servicemen Rally-ko Tura Dakkopgre-o donggipa SMELC-o ong·atenga.
Ia Ex-Servicemen Rally-ko a·bachengatanio, General Administration Department-ni Minister Sosthenes Sohtun, mongsonggipa sokgipa ong·e bak ra·angaha aro unbaksana GOC 101 Area-ni SM, Lt Gen Mohit Wadhwa-ba dongpae bak ra·angaha.
Ia program-ko ong·atanio, Meghalaya Lokayukta-ni Chairman CP Marak, Sainik Welfare Meghalaya-ni Director (Retd) Col Darryl Hopkins aro dingtang dingtang official-rangba bak ra·angaha.
Ia Ex-Servicemen Rally-ko a·bachengatanio, GAD Minister, jinmana aganprakengon, sipai dolrango kam ka·anggipa gitcham sipairangni kamrangna mittelpilangenba, ia program-ko ong·ataniara, an·tangtangko on·kange a·songna dangdike on·anggipa sipairangko mande ra·na aro dakchakna gita gisik ra·atani sal ong·a ine aganangaha.
Gitcham sipairangna aro uamangni nokdangrangna dangdike on·engani gimin ua dingtangmancha Sainik Welfare Department aro Zila Sainik Welfare office-rangkoba mittelpilangaha.
Sainik Welfare department-ni kamrango dakchakanirangko on·na gitaba ua ku·rachakaniko on·angaha.
Ia tom·anio Sainik Welfare-ni Director (retd) Col Darryl Hopkins-ba jinmana aganprakengon, Garo Hills-o Guest House-ko rikna gita sorkari, rakbee kamko ka·enga aro ia nokon, Zila Sainik Welfare office baksana CSD aro Chest Clinic-koba kulina miksongenga ine parakataha.
Ia salgnina ong·atenggipa Ex-Servicemen Rally-ko a·bachengatanio, Veer Nari-rangna aro gitcham sipairangna, GAD Minister aro gipin sokgiparangni jakchi mande ra·pilskaanikoba dakangaha.
