SHILLONG: Meghalaya a·dokni adhoc aro SSA skulrango skigiparang, chu·onga gita dormaharangko man·pajaengani a·sel neng·nikanirangko man·na nangengani gimin ia skulrango skigiparangna da·o Krismasna skangan, gital dormaharangko sorkari tik ka·gnok ine Mongolbar salo, a·dokni Chief Minister Conrad K Sangma, Nartiang Presbyterian Higher Secondary School-ni bilsi 50 gapaniko manianio bak ra·engmiting somoio parakataha.
Ia tom·bimonganio, a·dokni Deputy Chief Minister Sniawbhalang Dhar, JHADC-ni Chief Executive Membor Thombor Shiwat aro dingtang dingtang dilgiparangba bak ra·angtokaha.
Ia tom·anio Chief Minister-ni a·kangani gitade, 2018 bilsionin lekka porani kamrangara a·dok sorkarini mongsonggipa daitorangoni mingsa ong·aha aro bilsini budget ba tangka paisa chamanioba lekka porani kamrangna gong kror 2000-oni da·o kror 3,500-ona bariangaha.
Meghalaya a·doko ian lekka porani kamrangna tangka paisa chamani bang·batgipa ong·aha aro a·doko dingtanganiko nikna man·engaha ine Sangma aganaha.
Meghalaya a·doko dam 14,000-mangni gita skulrang aro sak 55,000-mangni gita skigiparang donge, salgro salaramni gipin a·dokrangna batpilengani a·sel neng·nikanirangko chagrongna nangenga ineba Chief Minister parakataha.
“A·dokni dam 206 skulrango skigiparang chu·onga gitan donggenchimoba poraigipa chatro chatrirang saksaba dongskaja aro dam 2000 skulrango skigipa sakbongaoni saksnimang dongskaoba chatro chatrirangde saksaoni sakbongamangsan dongskaaia. Iandakgipa obostarangko chagrongna nangengani a·sel skulrangko jako ra·gopna man·jaenga,” ine Chief Minister aganaha.
A·dokni pilak higher secondary skulrangon science stream-rangko ra·gatna sorkari cholrangko nienga ine janapatengon, a·dokni bang·bata biaprangon me·chikrangna hostel-rangko rikna gita a·dok sorkari, ma·mong sorkari baksa agangrikenga ine Chief Minister parakataha.
Nartiang Presbyterian HS School-na nokrangko rikdapna gita Chief Minister’s Special Development Fund-oniko gong lak 20 on·na gitaba ia tom·anio Chief Minister parakataha.
