RESUBELPARA: North Garo Hills a·jao Resubelpara Civil Hospital-ko rikani kamrang 90 percent-ni gitade matchotmanaha ine Resubelpara-ni MLA aro a·dokni Cabinet Minister Timothy D Shira, social media-o jinmana parakataha.
Shira-ni u·iatani gitade, da·o ia hospital-na ringa chirangkosan salna nangaiaha aro ia kamko matchotahaode, ia civil hospital-ko a·bachengna man·gnok.
“Kamrangko man·a dipet ta·raken chu·gimik matchotate on·china gita anga department baksa golpoaha,” ine Resubelpara MLA aro a·dokni Cabinet Minister Timothy D Shira parakataha.
Indake ong·engon, North Garo Hills a·jani Jawahar Navodaya Vidyalaya (JNV)-na permanent campus-ko nangchongmotengani gimin, ia JNV-ko rikna a·bachengna man·na gita da·o rama jal·langrangko tariengaha ineba Shira parakataha.
Shira-ni u·iatani gitade, ia biapona da·o dipet rama jal·langrang dongkujani a·sel skul nok aro hostel-rangko rikna man·kujaengachim.
“Da·o dipet North Garo Hills a·jani JNV-ko temporary ba dikdiksana ra·chenggipaosa chalaiengani gimin ia skulko dongkamnagipa biapona apjitangna man·na gita rama jal·langrangko tarina a·bachengataha,” ine Resubelpara MLA parakataha.
