NH-62 ramao truck garirangoniko niam gri tangka gilenga ine badi ka·a

WAGEASI: National Highway (NH-62) rama gita re·ruraenggipa garirangoniko GHADC aro Forest Department, Wageasi-o niam gri weighbridge-ko kulienba tangka gile ra·enga ine Nilbath Ch Marak, North Garo Hills a·jani Deputy Commissioner aro Superintendent of Police (SP)-na badi ka·doangaha.
Ia biapo niam gri weighbridge-ko kulie tangka paisarangko gile ra·engani a·sel ma·manti bosturangko salgipa garirang, bading chiwalgiparang aro ramram manderangba neng·nikanirangko chagrongna nangtokenga ine DC aro SP-na badi ka·doatgipa chittio Marak parakataha.
“Nangchakea man·gipa manderangni badi ka·anirangko man·soani ja·man aro an·tangba iani bidingo am·sandianirangko dakon, rama gita bostu salruragipa garirang, a·dok sorkarina kajinarangko gamani ja·manba, ia biapo tangka paisarangko gamna nangkuenga ine ma·sina man·aha,” ine Marak parakataha.
Ia rama gita ma·manti bosturangko salruragipa garirang, kajinarangko gamengoba, ia biapo niam gri weighbridge-ko kulie, garirangoniko tangka gile ra·enga ineba Marak matnangataha.
Koborko on·ani gitade, GHADC-ni weighbridge-o kam ka·enggipa manderang, tangka gamani sakkiko mesokna maming lekka gri, truck bolprakonikon gong 2000 ka·e tangka paisarangko dabie ra·enga.
“Ia truck garirangko tona gita weighbridge ning·achiba napan napjaenga indide maini gimin tangkarangko gilskaenga? Forest department-de weighbridge-rangko chalaina maming bil dongja indide maikai ia biapo tangkarangko gile ra·na man·enga? Ian GHADC aro Forest department-o kam ka·enggipa official-rangni ong·gija dakaniko mesokani ong·enga,” ine Marak parakataha.
Marak-ni parakatani gitade, niamo pangchake a·dok sorkarini Transport department, PWD ba Industries department-rangsan weighbridge-rangko chalaina bil donga indiba GHADC-ni weighbridge-ko chalaianide niamni a·palo ong·a.
“GHADC-ara Sixth Schedule Autonomous District Council ong·e, tangka paisarangko gile ra·na ba commercial garirangna weighbridge-ko chalaina bil dongja indiba Sixth Schedule-ni ning·osan bilrangko man·aia. Uni gimin GHADC Forest official-rangni weighbridge-ko chalaianiara niamni a·palo ong·a aro ta·raken champengatako man·na nanga,” ine Marak parakataha.
Ia weighbridge-o gari driver-rang tangka gamna jechakode, uamangko watninggija sengate donronga aro iani a·selan garirangko salanio noksan ong·na nangenga aro bosturangba somoi gita sokrongjaenga ineba Marak matnangataha.