Manderangna ka·sae dangdikchina sorkari official-rangko, police-rangko Marcuise didia
TURA: A·gilsakni gipin biaprango gitan International Human Rights Day-ko Budbar salo, Meghalaya Human Rights Commission (MHRC), Tura-ni District Auditorium-o maniangaha aro ia salko manianio, a·dokni PHE Minister Marcuise N Marak, mongsonggipa sokgipa ong·e bak ra·angaha.
Ia salko maniani bak gita program-ko ong·atanio, Captain Williamson Sangma State University-ni Vice Chancellor Dr Vasanthi Vijayakumar, MHRC-ni membor-rang, chong·motan H Nongpluh aro Baffindalyne Giri, MHRC-ni Member Secretary Levenstone Ch Marak, West Garo Hills a·jani Deputy Commissioner Vibhor Aggarwal, DIG (Western Range) JFK Marak aro gipinrangba dongpae bak ra·angtokaha.
Ia International Human Rights Day-ko manianio, a·dokni PHE Minister Marcuise N Marak, jinmana aganprakengon, Human Rights ba mandena on·gimin bilrangara, niamrangsan ong·aija indiba mande sakantini ka·donge aro ka·saani gnang dakna nanggipa kaman ong·a ine aganaha.
Manderangna dangdike on·anio pangnan nama bewalo aro ka·saani gnang kamrangko ka·china gitaba Marak, district administration, police aro dingtang dingtang sorkari official-rangko didiangaha.
“Pangnan kakketna, ku·rang on·pana man·gijagipa manderangna chadenge ku·rangko on·na aro namgipa songsalko ong·atna ku·cholsan kam ka·na gita an·ching an·chingni chadamberangko didiangkuna,” ine Marak aganaha.
Iana skang, MHRC-ni Member Secretary Levenstone Ch Marak, rimchaksoani kattarangko aganangengon, ia International Human Rights Day-ko December 10 tariko manianiara 1948 bilsio Universal Declaration of Human Rights-ko a·bachengataniko gisik ra·e manianian ong·enga ine aganenba, 2016 bilsi dipet MHRC-ni ka·baenggipa dingtang dingtang kamrangko jinmana talate on·angaha.
Ia tom·anio, CWSSU-ni Vice Chancellor Dr Vasanthi Vijayakumar-ba jinmana aganprakengon, mandena on·gimin bilara mandeni salanti janggi tanganio dakna nanggipa daitoan ong·a ine aganenba, ia bilko pangnan mande ra·china aro saksa sakgipinna ka·sae dangdike on·china didianiko on·angaha.
