Napsrukaniko champengna niam ra·gatchenggija rel gariko ra·bajachina mikrakata

SHILLONG: Meghalaya a·dokona niam gri napsrukbae songdong a·chaenggiparangko champengna chu·onga gita niamrangko ra·gatchenggija rel garirangko ra·bana sikkeljachina a·dokni gitcham Cabinet Minister aro Social Welfare department-ni Adviser Paul Lyngdoh, mikrakataniko on·angaha.
Khasi aro Jaintia Hills a·jarango Khasi Students Union (KSU)-ni rel garirangko ra·bana on·jaengani gimin janapatengon, ian skangoni jegalenggipa apsan kaman ong·a aro ian namen simsakbena nanggipa ong·a ine Lyngdoh aganaha.
“Rel garirangko ra·baani bidingo maming ja·kurangko de·na skangba, uamangni kenchakanirangko namatchengna nangchongmotenga,” ine ua aganaha.
A·doko Inner Line Permit (ILP)-ko ra·gate on·ani bidingo ma·mong sorkarioni mamingkoba tale aganchakanirang dongkujaengani gimin janapatengon, ian namen a·dokni manderangna jajaani aro suk ong·gijaniko ra·baani ong·enga ine Lyngdoh aganaha.
“Ma·mong sorkari maiko miksongenga, darangba name ma·sikuja indiba Meghalaya Legislative Assembly-ni nangchongmotgipa resolution ra·anina maming aganchakaniko on·jaenganiara namen dukni katta ong·a,” ine ua aganaha.
ILP-ni bidingo maming ka·donganirangko man·jaengoba, Meghalaya Residents Safety & Security Act (MRSSA)-ko bilakbatatnade cholrang dongskakuenga ineba Lyngdoh parakataha.
Lyngdoh-ni aganani gitade, ia MRSSA-ko nipiltaienba, nambate jakkalna man·na gita bilakgipa niamrangko ra·dapna man·kugen.
Meghalaya a·doko Inner Line Permit (ILP)-ko ra·gatchina gita ma·mong sorkariko didie, bilsidokna skangan Meghalaya Legislative Assembly-o resolution-ko pass ka·manahaoba da·alona kingkingan ILP-ko ra·gatani bidingo ma·mong sorkarioni maming talatanirang dongkujaenga ine adita salrangna skangsan, Khasi Students Union (KSU) suk ong·gijaniko parakataha.
KSU-ni president Lambokstarwell Marngar-ni parakatani gitade, ILP-ko ra·gate on·china gita KSU, changni chang dabianirangko dake jingjengatahaoba da·alona kingkingan India sorkarioni maming aganchakanirangko knasona ba nikna man·kujaenga.
ILP-na Meghalaya Legislative Assembly, 2019 bilsini December 19 tarikon resolution-ko pass ka·ahachim.
Meghalaya a·doko 2016 bilsionin ra·gatgipa MRSSA-ni bidingo janapatskaengon, ia niamko name ja·rikna ja·ku de·ani bidingo a·dok sorkari talatanirangko on·kujaenga ine KSU president matnangataha.
Meghalaya a·doko ILP aro MRSSA-ko ra·gatna gisiko nangjaenganiara, a·doko songdongenggipa Tribal manderangko chel·chakna gisik nanggijaniko mesokani gitasa ong·enga ineba Marngar aganaha.