NONGSTOIN: Adita salrangna skang, East Jaintia Hills a·jao niam gri chalaienggipa coke plant ba koela so·ani karkanarangko pe·e galani ja·man da·o West Khasi Hills a·jaoba niam gri chalaienggipa karkanarangko District Administration, police-rang baksa pe·e galaha ine kobor on·aha.
West Khasi Hills a·jao bilsignina skangan, Shallang aro samba jolrango niam gri chalaienggipa karkanarangko chipatna gita sorkari rakbee kamrangko ka·engachim aro da·o ia jolrango niam gri chalaienggipa karkanarangko district administration, pe·e galna man·aha.
West Khasi Hills a·jao donggipa dam 57 karkanarangoni dam 39-kode niam gri chalaiengani gimin 2023 bilsini July jaon pe·e galahachim indiba ja·mano karkana nokgiparang, iako champengchina Supreme Court-o badi ka·doangani ja·man, nanggipa lekkarangko man·kujaskal, ia karkanarangko chalaina gita Supreme Court rai on·aha. West Khasi Hills a·jao dam 57 karkanarangkon niam grisa chalaiengachim aro mitamrangde a·a nokgiparangni NOC griba karkanarangko chalaiengachim ine kobor on·aha.
Ia jolrango niam gri koela so·ani karkanarangko kulianirang batrorobaengani gimin Meghalaya High Court-ni ge·etaniko man·ani ja·man, ia niam gri chalaienggipa karkanarangko District Administration, pe·e galtokaha.
Kobor on·timgiparangni u·iatani gitade, ia jolrango niam gri chalaienggipa karkanarangko pe·e galchina gita re·anggipa 2024 bilsini November 25 tarikon Supreme Court, ge·etaniko on·ahachim indiba a·dok sorkarini gita tangka paisarangko dakchake on·anirang dongjani a·sel, ia karkanarangko pe·e galanio ja·manchakatako man·aha.
“Karkana nokgiparang, nangchongmotgipa lekkarangko mesokna man·jahani gimin ia karkanarangko pe·galchina gita SC rai on·ahani gimin chinga kamrangko a·bachengna tariahachim indiba chingna tangka paisani gita dakchakanirang dongjani a·sel kamrangko a·bachengningna man·jaha. Adita salrangna skang BP Katakey-ni re·ange niani ja·mansa tangka paisarangko chingna on·aha aro chinga da·o ia karkanarangko pe·galna man·aha,” ine kobor on·timgiparang parakataha.
Ia jolrango niam gri chalaienggipa karkanarangko District Administration aro police-rang, re·anggipa December 1 tarikoni 3 tarikona salgittamni gisepon pe·e galtokaha ine kobor on·timgiparang parakataha.
Pe·gala man·gipa karkanarangara, Kyllon Mathei-o dam 11, Nonghynrum-o damsa, Pyndengjalong Shallang-o damgni aro Swangre-o damgittam ong·a.
