NH-217 ramako apalbatatanio somoi gita u·iatja ine songni manderang matnanga

RONGJENG: National Highway (NH)-217 ramako apalbatate tarianio, East Garo Hills a·jani dingtang dingtang songrangna nangchongmotgipa u·iatanirangko somoi gita on·jahani a·sel, district administration-ni kamrango olgrokaniko nikna man·aha ine ia ramako tarianio nangchakeaniko man·enggipa songni manderang matnangtokaha.
Jolo songdongenggipa manderangni parakatani gitade, Deputy Commissioner (Revenue)-ni November 17 tariko u·iataniko aro uamangni gisepo ku·balitimgipako songani bidingo u·iataniko baditaba antirangni ja·mansa kobor man·soaha.
Ia u·iatanirangko talate on·na gita songni manderang baksa tom·anirangko ong·ataniba dongja aro seachiba uamangna talatanirangko dakjaha ine Rongjeng aro Rongmil jolrango, ia NH-217 ramana a·arangko ra·anichi nangchakeako man·gipa a·a nokgiparang aro dokkan nokgiparang parakaha.
Iandakgipa neng·nikanirangko ku·baltitimgiparangni gisepon an·tangtangari namatchina ge·etenba District Administration, do·garangko chipaha ine ma·sijaenba bang·a nokdangrangan an·tangtangni man·na nangkuenggipa compensation-na district office-rangona re·angtokkuaha.
Iandake, songni manderangna ja·manchakesa u·iatanirangko on·ahani gimin aro kamrangni bidingo mamingkon talate on·chengjahani giminba an·tangtangni bagan barirangko gimaatna nanggipa bang·a nokdangrangan suk ong·gijaniko paraktokaha.
“Iandakgipa u·iatanirangara namen nangchongmotgipa ong·genchimode maini gimin chingna somoi gita u·iatna man·jaha?” ine Rongjeng Bazar-ni mande saksa sing·doatenba, iandake nangchongmotgipa kamrangni gimin ja·manchakesa ma·siani a·selan songni manderang da·o neng·nikanirangko chagrongna nangtokengaha ine parakataha.
NH-217 ramako apalbatatna gita a·arangko ra·anio, Rongjeng Bazar-ni adita gitchambatsranggipa dokkanrangkoba pe·galaha aro iani bidingo somoi gita manderangna u·iatjani a·selan manderang, an·tangtangni gam-jinrangko gimaatna nangtokaha ine Rongjeng Bazar-o bading chiwalgipa MG Momin aganaha.
Indake ong·engon, songni manderangna maming u·iatani ba talatchengani gri iandake ja·kuko de·aniara sorkarini ka·saninggija mesokanisa ong·aha ine Tura-ni social activist aro Confederation of Meghalaya Social Organisations (CoMSO)-ni advisor Cherian G Momin parakataha.
“U·iatanikoba ka·mikkenatani gnangsa seaha aro iakoba ja·manchakesa u·iatkuenga. Iade a·songo sorkariko chalaiani bewal ong·ja indiba manderangni kosako dakdrana jotton ka·anisa ong·a,” ine Momin parakataha.