TURA: Anti Narcotics Task Force(ANTF) dolni sipairang, South West Garo Hills a·jani, Kalaichar Police Post-ni ning·o ong·gipa Jangari songoniko pekatgipa bosturangko badingsrukenganio jak donggipa sakgni manderangko kg 1.666 ong·gipa ganja-rang baksa rimaha.
Pekgipa bosturangko jolo badingsrukenganiko dakenggiparangko am·sandianiko, Jangari jolo songdongenggipa manderangni dakchakanichi ANTF sipai dolrang operation-ko a·bachengataha aro am·sandianio chu·sokgipa ong·e badingsrukenganio jak donggipa sakgni manderangko rim·na man·aha ine official talataha.
Indake rim·a man·gipa sakgni manderangara, Mahendraganj, Nandirchar songni bilsi 48 ong·gipa Faruk Sheikh aro Mahendraganj, Beparipara-oni bilsi 19 ong·gipa Md Bolurudin Bepari. Rim·a man·gipa manderangoniko am·sandianiko dakanganio, ANTF dolni am·sandigipa dolrang, potchipgipa ganjarangko Faruk Sheikh-oniko man·aha ineba officialrang parakataha.
Rim·a man·gipa sakgni manderangni kosako Narcotic Drugs and Psychotropic Substances (NDPS) Act-ni ning·o case-ko segataha aro am·sandianio man·gimin ganjarangko police dolrang ra·sekaha.
Una agreba a·doko pekatgipa bosturangko niamgri badingsrukenganiko dakenganio dal·bata gadangrango badingsrukenganiko am·sandianiko dakna police dolrang iani bidingo nambate am·sandianiko dakengkua.
