SHILLONG: Meghalaya a·doko Trinamool Congress (TMC)-ni bidingo bang·a dilgiparangan ka·dongchakna man·jae sing·dotokengon, a·doko TMC be·gruna sienga ine agananiko mitam dilgiparang aro MLA-rangde jegaltokskaaha.
TMC-ni gisepo kim·kim ong·anirang dongjaha ine matnanganirangko jegalatengon, seoka man·gipa party-ni MLA-rang, chu·gimik bilsi bonganan TMC-o ong·na gita dongimin niamrang donga ine TMC-ni saksa dilgipa aro Rajabala-ni MLA Dr Mizanur Rahman Kazi parakataha.
A·dokna aro a·dokni manderangna dangdike on·anian MLA-rangni skanggipa daito ong·a ine janapatengon, TMC-ni MLA-rangde, politics-ni kamrangna bate an·tangtangni kamrangnasa gisik on·bata ine Dr Kazi aganaha.
Dr Kazi-ni aganani gitade, MLA-rangni mongsonggipa kamara, party-ko nichenggija manderangna dangdike on·anisa ong·a aro da·o party-ni membor-rang, a·doko party-ko mangrakbatatna gita an·tangtangni gisepo chanchirimtokenga.
Somoi sokahaon, a·doko songdongenggipa manderangni nangani kri, party-ni dilgiparang ja·kuko de·angaigen ineba ua aganaha.
TMC-ni ning·o ku·mong nangrimani dongkuenga ine janapattaiengon, Meghalaya a·doko TMC, ku·cholsan ong·a aro pilak kamrangon apsan nangrimesa jekoba chanchirima ine TMC MLA parakataha.
