AMPATI: Jagittammangna skang, South West Garo Hills a·jani Marpara songo, chu peke kajia ong·ani ja·man, an·tangni noksul ripengko doke siatgipa sipai saksa, District Court-oniko jamin ra·e dongengani a·sel police-rang rim·na man·kujaenga ine kobor on·aha.
Koborko on·ani gitade, ia a·sel re·anggipa September jani 27 tarik attamni 2:00 bajimango ong·aha aro ua somoio chuttina re·anggipa ma·mong sipai dolni Biswajit Hajong, chu pekenba, an·tangni noksul, Manoj Hajong-ko ka·saninggija dake dokaha. Ua somoio uamang sakgnian chu pekachim.
Ia a·selni bidingo, dokako man·gipa mandeni ma·gipa, police-rangna skanggipa badi ka·aha.
Dokako man·gipa Manoj Hajong, bilsi 36-san ong·kuengpitichim aro ua bi·sa sakgittamni pagipa ong·achim.
Dokako man·ani ja·man Manoj-ko Betasing PHC-ona ra·angchengaha indiba uko first-aid on·e watpilaiaha. Iani ja·man, ua saknaanirangko chakna man·jahani gimin apsan walni 11:00 bajio uko Ampati Civil Hospital-ona ra·angaha aro salgipino, chong·motan September-ni 28 tarik attamni 4:00 bajimango uko Tura Civil Hospital-ona watatskaaha.
Ia a·selni bidingo darangba FIR ka·kujani a·sel, police-rangni sandirokanioba ja·manchakatako man·aha.
Koborko on·ani gitade, uni kosako case ka·na kenenba, Manoj-ko dokgipa mande an·tangan, uko Holy Cross Hospital-ona ra·angskaaha indiba uni obostarang namkaljaha.
Uni hospital-o dongengmiting somoio, uko changgni operate ka·na nangaha indiba ua nampilna gita man·jae ja·mano janggi galaiaha.
Uni sina gitik dakosa, ia obostani gimin name ma·sienba songni mande saksa October-ni 12 tariko, gital dake police-rangna badi ka·doangaha indiba ia mandeni jakgitele re·ramako nike, songni manderang suk ong·tokjaha.
Uandaken ja·mano songni manderang, South West Garo Hills a·jani Deputy Commissioner-ko grongenba, iani bidingo badi ka·aha aro ia case-ko name sandirokchina gita DC, ge·etaniko on·ataha.
Iani bidingo, South West Garo Hills a·jani Superintendent of Police (SP) Vikash Verma-o sing·sandiaton, ia case-ko police-rang sandirokengkua aro bakan charge-sheet ka·na siengaha ine parakatskaaha.
Dos dakgipa mande, district court-oniko jamin ra·e dongengani a·sel uko rim·na man·kujaenga ineba SP parakataha.
