SHILLONG: Meghalaya a·doko pangkamgipa tom·tomaniko ra·bana gita Hynniewtrep National Liberation Council (HNLC) bobil dolko agangrikaniona rimbapilna gisik nange kam ka·china United Democratic Party (UDP), Meghalaya sorkariko didiataha.
Re·anggipa December-ni 15 tariko, East Jaintia Hills a·jani Shymplong songo donggipa Dhar Construction Company-ni a·tipo Improvised Explosive Device (IED) bomako gopretani ja·man, HNLC bobil dolko tom·tomanina agangrikaniona rimbapilchina UDP, a·dok sorkariko didiataha.
Ia IED boma gopretanio, chi salgipa tanker nosto ka·ako man·aha indiba darangba saknaanirangkode man·jahachim. Ia IED boma gopretaniko HNLC bobil dol a·kangataha.
Iani bidingo kobor ra·timgipa manderang baksa agangrikengon, tom·tomaona re·bapilna gita HNLC bobil dol, sorkari baksa agangrikaniko a·bachengahachim indiba maini gimin HNLC bobil dol, sorkari baksa agangrikaniko ra·pilaha ba maini a·sel ia agangrikani bon·chipaha, da·onan tale ma·siate on·na dongkujaenga ine UDP-ni general secretary Titosstarwell Chyne parakataha.
Ua an·tangni gita aro party-ni gitaba HNLC bobil dolni dilgiparangko, a·dokni namgnina aro tom·tomanina, sorkari baksa agangrikaniona re·bapilchina nangnikenga ineba Chyne parakataha.
“Anga ka·donga, HNLC bobil dolko agangrikna okamtaina gita sorkari gisiko nangbate kamko ka·gen,” ine UDP-ni general secretary aganaha.
HNLC bobil dolni dilgiparangko sorkari baksa tom·tomanina agangrikaniona re·bapiltaichina gita batanggimin somoirangoba a·dok sorkari, changni chang okamatengachim ine nikna man·a.
HNLC bobil dolni chubatao donggipa dilgiparangko agangrikna re·bachina sorkari okamatengoba da·o dipet HNLC bobil dolni dilgiparang iani bidingo maming aganchakanirangko on·skakujaenga.
HNLC bobil dolko agangrikaniona rimbapilchina sorkariko UDP didia
Date:
Share post:
