SHILLONG: Khasi Hills Autonomous District Council (KHADC)-ni kamrango Hynniewtrep National Liberation Council (HNLC) bobil dolko jak on·jachina didiatani ja·man, an·tangko ‘Blei Khyndew’ ba ‘A·gilsakni Isol’ dake mesokjachina VPP-ni president Ardent Miller Basaiawmoit-ko HNLC bobil dol mikrakatskaaha.
“Hima Sohra-ni acting Syiem ong·e kam ka·enggipa Mynjurlang Majaw-ara, VPP-na kam ka·gipa mandean ong·a ine chinga namen ma·sia, uni gimin Hima Sohra-ni Syiem-ko songanio KHADC-ni chu·sokgijanina chinga ku·rang on·aigen. Ardent Basaiawmoit an·tangko nama ine chanchijachina aro ‘Blei Khyndew’ ba ‘a·gilsakni Isol’ gita an·tangko mesokjachina,” ine HNLC-ni general secretary Sainkupar Nongtraw parakataha.
KHADC-ni kamrango jak on·jachina Basaiawmoit-ni agangipa kattarangna aganchakaniko on·atengon, “Tribal jatrangni bilrango nangchakegipa je kamoba HNLC, jak on·pana bil dongaia,” ine Nongtraw parakataha.
“Kakket ong·gipa Daud-de dakgrikram biapona re·angna skang, maming saloba camera-ni mikkango begulko sike mesokja. Nanggenchimode tol·pinapgipa Daud-ba boli on·gipa do·bok pil·na nangaigen,” ineba HNLC bobil dolni general secretary parakataha.
Nongtraw-ni parakatani gitade, ‘The Blueprint of Hynniewtrep’ ingipa ki·tapko HNLC bobil dol, bakan chapa ka·na sienga aro ia ki·tapon Basaiawmoit-ni minggni sing·anirangna aganchakaniko on·gen.
“Apsan somoion anga Ardent-o mingsako sing·na sikenga – ua saksa Tribal jatoni ong·e, nok nokgipa ong·na skama ma para ra·e dongna ska?” ine HNLC bobil dolni general secretary sing·doataha.
