TURA: West Garo Hills a·jao, mongsongbate a·kawe jolrango bijoliko name on·na man·jaengoba, bijolini kajinarangko bariatahani gimin jegale, adita salrangna skang, jinma tom·bimonganiko Phulbari-ni Inspection Bungalow (IB)-o ong·atangaha.
Ia tom·anio, Rajabala-ni MLA Dr Mizanur Rahman Kazi, Dadenggre MLA Rupa M Marak, Phulbari-ni gitcham MLA SG Esmatur Mominin, dingtang dingtang NGO-rang, nokma-sordarrang aro jolo songdongenggipa manderangba bak ra·angtokaha.
Ia tom·anio, Rajabala, Phulbari, Dadenggre aro Selsella constituency-ni bang·a manderangan bak ra·angtokaha aro bijolini bill-rang nangana bate sokrokengani gimin aro bijoliko name on·na man·jaengani gimin an·tangtangni suk ong·gijaniko parakangtokaha.
Ia jolrango songdongenggipa nokdangrangna private company-sa bijoliko on·engani a·sel songni manderang aro dingtang dingtang karkanarangko chalaienggipa manderang neng·nikanirangko chagrongna nangtokenga ineba ia tom·anio matnangtokaha.
West Garo Hills a·jani a·kawe jolrango bijoliko name man·jaengani gimin gitcham power minister-ba raken kamrangkode ka·ahachim indiba bang·e dingtanganiko nikna man·kujaenga ine jolni dilgipa saksa parakataha.
Bijoli on·aniko skangode FEDCO-sa jako ra·achim indiba ia kamko gipin company-na on·a intalan ia neng·nikanirangko namatchipna man·jaengaha ineba ua aganaha.
Ia jolrango nangana bate bijolini bill-rang sokengani a·selan songsalo bijoliko jakkalenggipa pilak nokdangrangan neng·nikanirangko chagrongna nangtokenga.
Bijolini bill-rangko bariatani bidingo janapatengon, bijolini bill-rangko bariatanichi, gama ge·anirangoba bijolini damrang rakbatgnok aro ian ia jolrango game ge·e cha·giparangna neng·nikaniko ra·baani gita ong·gnok ine dilgiparang parakataha.
Songo noko bijoliko name man·jaengani gimin aro bijolini bill-rangko nambate tarichina didiatengon, ia neng·nikanirangko jako ra·e, sorkari baksa agangrikchina gita jolni manderang, ia jolni MLA-rangko didiataha.
