Gari a·sel ong·ani ja·man niam gri gue badinggiparangko rim·a man·taia

SONGSAK: East Garo Hills a·jani Songsak jolo, gue salgipa gari bolsa bikpile a·sel ong·ani ja·man, niam gri Burma a·songni guerangko Bangladesh gita Meghalaya a·dokona badingsrukbaenganiko nikna man·taiaha.
Burma a·songni guerangko Bangladesh a·song gita Meghalaya a·dokona badingsrukbaengani a·selan a·doko, mongsongbate Garo Hills-o gue bagan dake cha·enggipa manderang, bang·en noksan ong·na nangtokahachim aro iani bidingo Tura-ni MP Saleng Sangma aro Opposition dolni dilgipa Mukul Sangma-ba changni chang ku·rang on·ahachim.
Burma a·songni gue granrangko South Garo Hills, South West Khasi Hills aro West Khasi Hills a·jani sima gita India a·songni dingtang dingtang biaprangona badingsrukbaengani a·sel Garo Hills-o gue bagan dake cha·enggipa manderang noksan ong·na gita nangtokengachim aro iani bidingo dingtang dingtang dolrangba raken jegalanirangko daktokahachim.
Indake ong·genchimoba, re·anggipa 2024 bilsini a·bachengachibara, niam gri Bangladesh a·song gita gue badingsrukaniko champengatna man·ani ja·man Garo Hills-o gue bagan dake cha·enggipa manderang, an·tangtangni guerangko dam namkale palna cholrangko man·tokpaahachim.
Indake ong·engon, East Garo Hills a·jani Songkama Rongre song sambao, niam gri gue salgipa gari bolsa bikpile a·sel ong·ani ja·man, niam gri gue salgiparangko nikna man·taiaha ine re·anggipa December 24 tariko, Tebil Bonegre songoni saksa Jesse Marak minggipa mande, Songsak Police Station-o FIR ka·doangaha. Ia mandeni FIR-o janapani gitade, ia a·sel ong·ako ua December 24 tarik pringni 7:00 bajio nikna man·aha.
“Bangladesh a·songoni guerangko nangchongmotgipa lekkarang gri, India a·songona niam gri badingsrukbaenga ine nikna man·aha. Iandake niam gri guerangko badingsrukbaaniara niamni kosako re·asan ong·jaenga indiba Garo Hills-o gue bagan dake cha·enggipa manderangna noksan ong·anikoba ra·baenga,” ine FIR-o Jesse Marak parakataha.
Burma a·songni guerangko Bangladesh a·song gita Meghalaya a·dokona badingsrukbaenganiara game ge·e cha·giparangnasan ong·ja indiba a·dok sorkarini kajina man·anioba gimaani ong·enga ineba Marak parakataha.
Niam gri gue badingsrukaniko sandirokchina didiatengon, a·sel ong·anio ga·akgipa gari aro guerangko rim·enba, ia guerangko badingsrukanio jak donggipa manderangni kosako rakgipa ja·kurangko de·china Marak didiataha.