SHILLONG: Meghalaya a·doko dingtang dingtang political party-rangni dilgiparang, Bharatiya Janata Party (BJP)-o napna gita agangrikenga aro ia dilgiparangni bimingrangko parakatahaon manderang jagokmanpilgen ine Sonibar salo, BJP-ni state president Rikman G Momin parakataha.
Dingtang dingtang political party-rangni dilgiparang, BJP-o napna miksonganirang donga ine janapgipani bidingo sing·anina aganchakaniko on·angengon, da·o dipet ia dilgiparang, BJP-o napna agangrikengkua ine Momin aganaha indiba ia dilgiparangni bimingrangko da·o dipet parakna gita jechakataha.
Iani bidingo bakan talbate ma·sina man·gen ine u·iatengon, BJP-o napna sienggipa manderangara, mingsinggipa dilgiparangan ong·a ine Momin parakataha.
Iani bidingo talbate aganna gita jechakatengon, ia dilgiparangni BJP-o napaniara pangna dakronga gita ong·jawa indiba namen dingtangmanchagipa ong·na sienga ine BJP-ni state president aganaha.
BJP-oni koborko on·ani gitade, batanggimin antirangonin a·doko BJP-ko bilakbatatna gita party-ni membor-rang, dingtang dingtang dolni dilgiparang baksa agangrikenga aro ia dilgiparangara bang·batan mingsinggipa manderangan ong·a.
Meghalaya a·doko BJP-ko bilakbatatna gita rakbee kamrangko ka·engon, kamni gimin ma·sigipa aro gitcham dilgiparangko party-ona rimbana gita rakbee kam ka·anirangko nikna man·engachim.
Politics-ni a·bao niksenggipa manderang, saksa sakgni BJP-o napgenchimoba, namen dingtanganiko ra·bana man·gen ine politics-ni gimin u·i-ma·sigipa manderang aganaha.
Indake ong·engon, dingtang dingtang party-ni dilgiparang baksa agangrikanirang matchotahaon, BJP-o napna sienggipa manderangni gimin party-ni dilgiparang jinmana u·iatgen ine BJP-ni state president Rikman Momin parakataha.
