SHILLONG: Meghalaya a·dokni State Reservation Policy (SRP)-ni bidingo Expert Committee-ni on·gipa report-ko a·dok sorkari nipilmanahaode, jinmana parakanio maming neng·nikanirang dongna nangja maina ia report-ko jinmana mesokachi parak ong·ani dongbatgen aro jinmaba iani bidingo nambate chanchirimna cholrangko man·kugen ine a·dokni BJP parakataha.
Iani bidingo kobor ra·timgipa manderang baksa agangrikengon, Reservation Policy-ni bidingo Expert Committee-ni on·gipa report-ko jinmana parakanichi manderangba, iani bidingo chanchirimna man·gen aro a·dok sorkarinaba taridapna nanganirangko taridapna chol ong·gen ine BJP-na ku·wattimgipa Mariahom Kharkrang parakataha.
Ia report-ko jinmana parakanio maming ong·gijani dongja ine janapatengon, ia report-ko jakgitelgipa expert committee-sa tariaha aro committee-ni ku·pattianirangko a·dok sorkari, ra·chakna ba jegalnaba man·aia ine Kharkrang aganaha.
“Ia report-o jeko sea, uko chu·gimik ra·gatna nanggen indakede ong·ja aro expert committee-ni ku·pattianirangko ra·chakani ba jegalanide sorkarini jakosa ong·aia. Indiba ia report-ko jinmana mesokanichi, manderangba iani bidingo chanchirimna aro jera ra·grikna cholko man·gen aro taridapna nanganirang donggenchimoba, taridapna man·aigen,” ine BJP-ni dilgipa aganenba, ia report-ko jinmana mesokanichi, maming dongnuani gri ong·na man·gen ine parakataha.
A·dokni State Reservation Policy-ko nangani kri nambate tarina man·na gita Expert Committee-ni on·gipa report-ko name nipilna chu·onga gita somoiko a·dok sorkarina on·china, adita salrangna skangsan, National People’s Party (NPP)-chi dilenggipa Meghalaya Democratic Alliance (MDA) sorkario bak ong·enggipa United Democratic Party (UDP) didiatskaahachim.
UDP-ni general secretary Titosstarwell Chyne-ni aganani gitade, Expert Committee-ni on·gipa report-ara, king 4000-oni 5000-mangni gita lekkarang dongani gimin, ia report-ko jinmana parakna skangba name nipiltaianio bewalan somoirangko nangkugen.
“King 4000-oni 5000-mang ong·pilgipa report-ko taridapna aro bon·kame manderangna mesokna gitade somoiko nangaigen. Uni gimin a·dokni reservation policy-ko name matchote tarina gita sorkarina somoiko on·na nangaigen,” ine Chyne aganaha.
Iani bidingo Chief Minister, an·tangan talataniko on·manahani gimin sorkarini miksonganirangko darangba ong·gija dake chanchichipna nangjawa ineba UDP-ni dilgipa aganaha.
State Reservation Policy-ni bidingo Expert Committee-ni on·gipa report-ko bakan manderangna parakatgnok ine adita salrangna skangsan a·dokni Chief Minister Conrad K Sangma parakatenba, ia report namen bakroani a·selsa aro ia kamara namen simsakna nanggipa ong·ani giminsa somoiko ra·kuna nangenga ine talataniko on·angahachim.
Ia report-ko jinmana parakjagenchimode, jingjengatanirangko dakanggen ine Voice of the People’s Party (VPP)-ni president aro Nongkrem MLA Ardent M Basaiawmoit aganahani gimin a·dokni Chief Minister, ia talataniko on·angaha.
