ILP-kon chu·gimik ra·gatchina dabia
SHILLONG: Gital ra·gatgipa Immigration & Foreigners Act 2025-o Inner Line Permit (ILP) gita dakgipa niamrangko on·dapna ma·mong sorkari ku·rachakaha ine Mongolbar salo, a·dokni Deputy Chief Minister aro Home (Police) Minister Prestone Tynsong-ni parakataniko Budbar salo, Hynniewtrep Youth Council (HYC) jegalatenba, ian a·doko ru·utbea bilsirangna ILP-ko ra·gatchina dabianiko bilgriatna jotton ka·anisa ong·enga ine parakataha.
‘ILP gita’ dakaigipa niamrangde ILP gita apsan ong·jawa ine janapatengon, iandakgipa ka·dongatani kattarangchi a·dokni manderangko sorkari, dilsretna man·jawa ine HYC parakataha.
Tribal manderangni nanganirangko chu·sokatna a·dok sorkari, gisik nangchongmotenga ong·ode, iandake ‘chu·gimik’ ong·gijagipa ku·rachakanina bate ILP-kon ra·gate on·aigenchim ineba HYC parakataha.
Meghalaya a·doko gipin jatrangni napbaani, dongani, kam ka·ani, bading chiwalani aro songdong a·chaaniko nirokna gita chu·gimik bil on·gijagipa niamrangko ra·gatanide a·doko songdongenggipa Tribal jatrangko cha·bokani gitasa ong·aigen ineba HYC parakataha.
Iandake ma·mongni niamrangko on·dapaniara niam gri napsrukaniko champengna aro namatna dakchakani ong·jawa ineba HYC parakataha.
Immigration & Foreigners Act 2025-o ILP gita dakgipa niamrangko on·dapgen ine agananiara, manderangko jajaatna jotton ka·anisa ong·enga ine janapatengon, ian a·dok aro ma·mong sorkarirangni, kamtangko chu·sokatanio gisik nanggijaniko mesokanisa ong·a ine HYC parakataha.
Bengal Eastern Frontier Regulation 1873-ni ning·o on·gipa ILP-kon chu·gimik ra·gatna nanggen ine janapatskaengon, gipin niamrangko ra·gatna jotton ka·anide a·dokni manderangko cha·bokanisa ong·aigen ine HYC parakataha.
