SHILLONG: Ia gital 2026 bilsio, Meghalaya a·dokni dingtang dingtang nanganirangko chu·sokatna aro neng·nikanirangko namatna man·na gita a·doko political dolni dilgiparangko aro dingtang dingtang NGO-rangko man·chape a·doko songdongenggipa pilak manderangkon ku·cholsan bakrime kam ka·china gita a·dokni gitcham Cabinet Minister aro MLA Ampareen Lyngdoh didiataha.
A·dokona rel garirangko ra·baani aro reservation policy-ko nipiltaiani bidingo janapatengon, indita bilsirangna ia kamrangko chu·sokatani bidingo jera ra·grikanirangko aro chanchirimanirangko dakahaoba da·alonan ia kamrangko chu·sokatna man·chipkujaenga ine Lyngdoh parakataha.
Iandakgipa kamrango ku·cholsan ong·anirang dongjaengani a·selan a·dokna namroro silroroaniko ra·baanio aro dingtang dingtang kamrangko chu·sokatanio neng·nikanirangko chagrongna nangenga ineba Lyngdoh aganaha.
Meghalaya a·doko dingtang dingtang nanganirangna ku·cholsan ong·e chanchirimani aro an·tangtangni ma·sianirangko on·ani pal bang·bata changon meligrijgijanirangchisa bon·chipatronga ineba NPP-ni dilgipa aganaha.
Gisikni gita breaniko aro chanchirimanirango bak ra·na nangenganiko janapatengon, pilakan ku·cholsan ong·e agangrikanio bak ra·anichi, saksa sakgipinko mande ra·grikanichi aro knatimna skani donganichisa a·dok re·mikkangna man·gen aro dingtang dingtang neng·nikanirangko namatna man·gen ine Lyngdoh parakataha.
A·dokni nanganirangko chu·sokatna pilakkon bakrimchina Ampareen didia
Date:
Share post:
