SHILLONG: Immigration & Foreigners Act 2025-o Inner Line Permit (ILP) gita niamrangko on·dapna ma·mong sorkari ku·rachakaha ine a·dok sorkarini parakataniko Hynniewtrep Youth Council (HYC) jegalatani ja·man, 2019 bilsio ILP-na Meghalaya Legislative Assembly-ni pass ka·gipa resolution-ni bidingo talataniko on·china Khasi Students Union (KSU), ma·mong sorkario dabiangskaaha.
ILP-ko ra·gatchina gita Meghalaya Assembly-ni pass ka·gipa resolution-ni gimin janapatengon, iani bidingo da·alona kingkingan maming aganchakanirangko on·chipkujaenga ine Sukrobar salo, KSU-ni president Lambok S Marngar, ma·mong sorkariko sing·doataha.
“Meghalaya a·dokna ILP-ko on·na miksonganirang dongama dongja, iako ma·mong sorkari talate on·na nanga,” ine Marngar parakataha.
Gital ra·gatgipa Immigration & Foreigners Act 2025-o ILP gita dakgipa niamrangko ra·gatna ma·mong sorkari ku·rachakaha ine a·dok sorkarini parakatgipani bidingo sing·anina aganchakaniko on·angengon, a·doko ILP gita dakgipa mai niamrangko a·dok aro ma·mong sorkarirang ra·gatna miksongenga, uko KSU nichengna nangenga ine KSU president parakataha.
“Da·o dipet chinga iako songbadrangonikosan nikna man·engkua,” ine Marngar aganaha.
Meghalaya a·doko niam gri napsrukanirangko champengna gita adita salrangna skang ra·gatgipa Immigration & Foreigners Act 2025-o Inner Line Permit (ILP) gita dakgipa niamrangko on·dapna ma·mong sorkari ku·rachakaniko on·aha ine adita salrangna skangsan a·dokni Deputy Chief Minister aro Home (Police) Minister Prestone Tynsong parakatahachim.
Tynsong-ni parakatani gitade, adita salrangna skang, New Delhi-o Union Home Minister Amit Shah-ko New Delhi-o grongeani somoio, a·dokni Chief Minister Conrad K Sangma aro a·dokni gipin dilgiparang, ILP aro gital Immigration & Foreigners Act 2025-ko man·chape dingtang dingtang niamrangni bidingo chanchirimaha aro ia Foreigners Act-o ILP gita dakgipa niamrangko on·dapna Union Home Minister, ku·rachakaniko on·ataha.
“Meghalaya a·doko ILP gita dakgipa apsan niamko ra·gatna, Immigration & Foreigners Act 2025 baksa maikai ILP-ni niamrangko ra·dimna man·gen, uarangni gimin chinga Union Home Minister baksa chanchiaha aro ia chanchirimanio Union Home Minister-ba ILP-ni niamrangko on·dapna kusi ong·e ra·chakaha. Ia gital niamni ning·o Meghalaya a·dokkoba chel·chakgipa biap dake parakna mikkang antini gisepon Union Home Secretary, a·dokni Chief Secretary aro Director General of Police (DGP) baksa tom·e chanchirimangnaba gnang,” ine Deputy Chief Minister Prestone Tynsong parakataha.
Immigration & Foreigners Act 2025-o ILP gita dakgipa niamrangko on·dapna ma·mong sorkari ku·rachakaha ine Tynsong-ni parakataniko Hynniewtrep Youth Council (HYC) jegalatskaenba, ian a·doko ru·utbea bilsirangna ILP-ko ra·gatchina dabianiko bilgriatna jotton ka·anisa ong·enga ine parakatahachim.
‘ILP gita’ dakaigipa niamrangde ILP gita apsan ong·jawa ine janapatengon, iandakgipa ka·dongatani kattarangchi a·dokni manderangko sorkari, dilsretna man·jawa ine HYC parakataha.
 |
|
