RESUBELPARA: Sonibar salo, a·dokni Chief Minister Conrad K Sangma, ia 2026 bilsini skanggipa CM-Connect program-ko North Garo Hills a·jani Adokgre C&RD Block ning·o donggipa Memillam songo ong·atangenba, jolo songdongenggipa manderangni nanganirangko aro neng·nikanirangko knatime ra·angaha.
Ia tom·anio a·dokni Cabinet Minister Marcuise N Marak, Kharkutta-ni MLA Rupert Momin, Rongjeng MLA Jim M Sangma aro dingtang dingtang department-ni official-rangba bak ra·angaha.
Ia tom·anio a·dokni Chief Minister, Memillam aro wilwilao donggipa dingtang dingtang songni manderangna aganprakengon, ia jolni manderang baksa agangrikna cholko man·ahani gimin an·tangni kusi ong·aniko parakangenba, ia CM-Connect program-ara, songni manderang baksa mikkanggrik agangrike, dingtang dingtang neng·nikanirangko namatna aro nanganirangko chu·sokatna chol ong·a ine parakangaha.
Songni manderang baksa agangrikanichi sorkari, manderangni nangani kri kamrangko ra·gate on·na aro somoi gita chu·sokate on·na man·a ineba Chief Minister aganaha.
Ia tom·anio songni manderangba, an·tangtangni neng·nikanirang aro nanganirang, jekai rama jal·lang, bijoli, ringani chi, skul nok aro gama ge·ani kamrangko Chief Minister-na agan-talate on·angaha aro ia kamrangni bidingo chanchirimanirangko dakenba, ia pilak neng·nikanirangko ua, dingtang dingtang department-rang baksa agangrike, chu·sokate on·gen ine Chief Minister, ku·rachakaniko on·angaha.
World Bank-ni dakchakanichi Memillam songko nangdimeate, Adokgre-oni Mangsang-ona ramako tarina gita sorkari gong kror 200 tangkarangko chamataha aro ia kamrangko bakan a·bachengatgnok ineba Chief Minister, ku·rachakaniko on·angaha.
Memillam songo skul nokko rikna gita Chief Minister’s Special Development Scheme-ni ning·o tangka paisarangko chame on·atgen ineba Chief Minister, songni manderangna ku·rachakaniko on·angaha.
CM-Connect program-ko ong·atani miksonganirangko talate on·angengon, sorkarini kamrangko manderangona sokatna gita sorkari aro manderangni gisepo apsan tom·e chanchirimna ia program-ko ong·atenga ine Chief Minister parakataha.
