TURA: January-ni 3 aro 4 tarikrango, South Garo Hills a·jani Krishi Vigyan Kendra (KVK), Vikshit Bharat-Guarantee for Rozgar & Ajeevika Mission (Gramin) Bill, 2025-ni bidingo mass awareness campaign-ko Dagal Gopgre-o donggipa KVK campus-o ong·atangaha.
Ia awareness campaign-ni bak gita Sarpanch Sammelan-ko January-ni 3 tariko, ia apsan biapon ong·ataha aro ia program-o Chokpot Block-ni ning·o donggipa Badimagre, Papa Songgital, Kene Chaneagre, Kenegre, Omakgre, Jalegre, Dagal Gopgre, Dagal Asimgre, Kene Anchengre and Budugre songni Nokma-Sordarrang bak ra·angtokaha. Ia Sarpanch Sammelan-o songo noko job card-rangchi kam ka·e cha·enggipa sak 90 manderangba bak ra·angtokaha aro ia tom·anio songni dilgiparangna aro job card donggipa manderangna, VB-GRAM-G Bill 2025-ni bidingo agan-talate on·angaha.
Iani ja·man gnigipa salo, Village Goshthis aro Walking Seminar-ko, Ringkap Sonawari, Balwatgre, Rikapgre, Rongbalbanggre, aro Dagal Gopgre songrangna ong·atangskaaha aro ia walking seminar-oba sak 320-mangni gita job card donggipa manderang bak ra·angtokaha.
Ia salgnina ong·atanggipa mass awareness campaign-o gimik sak 410 job card holder-rangna Vikshit Bharat-Guarantee for Rozgar & Ajeevika Mission (Gramin) Bill, 2025-ni miksongani, namgni aro niamrangko agan-talate on·na man·aha.
