SHILLONG: United Democratic Party (UDP)-ni ning·o dilgiparang, saksa sakgipin baksa meligrikna man·jaenga ine jangbingbanganiko UDP-ni dilgipa aro gitcham Cabinet Minister Paul Lyngdoh jegalataha indiba party-ko democratic ong·atna gita namdapatna nangenga ine parakatskaaha.
Lyngdoh-ni parakatani gitade, UDP-ni ning·o meligrikna man·tokjaenga ine jangbingbanganiara kakket ong·ja indiba party-ko dilgiparang, songadam nokadamrango party-na kam ka·enggipa manderang baksa pilak kamrangon agan-chanchirimanirang dongskana nangenga.
UDP-ko bak ong·angenga ine janapanirangna aganchakaniko on·angengon, “Indake agananiko anga an·tangde ong·e nikja maina party-ni ning·o chanchianirang dingtanggriknaba gnang indiba bak ong·ani kattade dongja,” ine UDP-ni dilgipa aganaha.
Meghalaya a·dokni gitcham chief minister Donkupar Roy aro da·o Cabinet minister ong·enggipa Metbah Lyngdoh-ni UDP-ko president ong·e dilanio apsanaiama ine sing·anina aganchakaniko on·angengon, “Mande sakantian kam ka·ani bewalrang dingtanggrikaiani gimin mande sakgninide apsan ong·na man·jawa ba kamrang apsanangna man·jawa,” ine Lyngdoh aganaha.
UDP-ni dilgiparang, mongsongbate party-ni president Metbah Lyngdoh baksa meligrikna man·jaenga inakoba ua raken jegalataha.
UDP-ko rikanio me·chik aro chadambe dolrangba, mongsonggipa kamrangko ka·aha ine janapatengon, party-ni mongsonggipa kamrangon uamangko nichanggalrongskaa ine Lyngdoh, an·tangni suk ong·gijaniko parakataha.
“Party-ko rikanio, me·chik dol, chadambe dol aro songo noko party-na kam ka·enggipa manderangba mongsonggipa kamrangkon ka·enga indiba party-ni mongsonggipa kamrango, uamangni chanchianirangko ra·jaenganiara namen kragijani ong·a,” ine UDP MLA aganaha.
