CM Connect program-ko Shillong-ni dingtang dingtang gittimrang ra·chaka

SHILLONG: Sorkarini kamrangko nambate chu·sokatna gita sorkari aro manderangni gisepo mikkanggrik agangrikna ra·gatgipa CM-Connect program-ko Shillong songjinmani dingtang dingtang gittimrango songdongenggipa manderang aro jatko dilgiparang namnike ra·chakangtokaha.
CM Connect program-o sorkari official-rang baksa jolo songdongenggipa manderang, mikkanggrik agangrike, an·tangtangni neng·nikanirangko aro nanganirangko aganna gita cholko on·ani gimin ian sorkarini kamrangko nambate chu·sokatna dakchakani ong·enga.
CM Connect program-o manderang, an·tangtangni nanganirang, jekai rama jal·lang, ringani chi, bijoli aro uandakgipa kamrangni gimin aganna gita cholrangko man·a aro manderangni nanganirangna ua biapon sorkari official-rang aganchakaniko on·e, kamrangkoba niatna nanga.
Ia program-ko ong·atanio manderang, an·tangtangni nanganirangko aro neng·nikanirangko paraken aganna man·aiani gimin aro uamangni nanganirangko sorkari, apsan somoion chu·sokatna nangengani gimin ia program-ko bang·a manderangan namnike ra·chaktokaha.
Ia program-ko a·bachengatahani gimin Riatsamthiah-ni Rangbah Shnong Mariahom Kharkrang-ba mittelpilaniko parakatengon, ian manderangni nanganirangko chu·sokatanio, mingsa ‘nambegipa ja·ku de·ani’ ong·a ine aganaha.
“Sorkarini nikani aro biapo ong·a obostarang bang·a changon namen dingtanggrikronga. Uni gimin ian sorkarini kamrango kolgapgijaniko kolgapatna dakchakani ong·gen,” ine Kharkrang aganaha.
Shillong songjinmao biaprang apchangket ong·anirang batrorobaengani gimin aro buring bolgrimrang komiroroangengahani giminba ua an·tangni jajrengchakenganiko parakataha.
Lumshatsngi Kench’s Trace-ni Rangbah Shnong Wallambok Lyngdoh-ba apsan daken CM Connect program-ko a·bachengatahani gimin an·tangni kusi ong·aniko parakataha aro ian Chief Minister baksa agangrike, an·tangtangni neng·nikanirangko ta·raken namatani chol gita ong·enga ine aganaha.
“Skangode manderangni neng·nikanirangko, dingtang dingtang gadangni official-rang gitasa sorkarina u·iatna man·aiachim indiba da·ode ia CM Connect program-chi manderang, chief minister baksa agangrikna aro an·tangtangni neng·nikanirangko janape on·na chol on·engaha,” ine Lyngdoh aganaha.
Ia CM Connect program-rangko pilak biaprangon ong·atjringchina didiatengon, an·tangni gittimo ua maikai CCTV camera-ni gimin janape, ta·raken CCTV camera-rangko chatna man·aha, uni giminba Lyngdoh janapangaha.
Mission Compound Dorbar Shnong general secretary Donkupar War-ba apsan daken, CM Connect program-ko mittelpilangaha aro ian a·doko sorkarini kamrangko namdapatani aro a·dokko nitoatani chol gita ong·aha ine parakataha.
War-ni aganani gitade, iandakgipa program-ko ong·atanio ua traffic-ni apchangket ong·ani bidingo ku·rang on·aha aro uni nangnikaniko a·dokni Chief Minister, dingtang dingtang department-rangchi chu·sokate on·na ku·rachakaniko on·aha.