SHILLONG: Indo-Bangladesh sima ariogipa West Jaintia Hills joloniko niamgri badingsrukani gimin rim·e rakkigimin mang 1,192 matchu-matterang, manderangna dakkina ba auction ka·na skangan gimaaha ine koborko man·soaha jerangkon Prevention of Cruelty to Animals (Care and Maintenance of Case Property Animals) Rule, 2017 niamo pangchake palna donengachim.
Ia a·sel obostarangko RTI activist, Wanbiang Mowa parakaha, jean matchu-matte gimaaniko ja·pang ja·dilko official inquiry dakchina gita dabiaha.
Badingsrukako rim·rikgipa matchu-matterangko mai dakronga ine bang·a changon East Jaintia Hills-ni Mihmyntdu Moowamon songni RTI activist, Wanbiang Mowa aro Ratacherra songni Happydong Jungai mang sing·achim, indiba kragipa aganchakaniko man·rongjachim.
Indake ong·engon, RTI ka·gipana District Animal Husbandry & Veterinary Officer-ni aganchakani gitade, 2023 bilsio mang 334, 2024 bilsio mang 395 aro 2025 bilsio 463 matchu-matterangko rim·rikahachim ine ma·sina man·aha.
High Court-ni rai on·gimin gitade, Border Security Force ba Custom-rangni ra·sekgimin matchu-matterangko Society for Prevention of Cruelty to Animals (SPCA)-ni Mushai, Raliang, Mowkaiaw aro Thadmuthlong-o dikdiksana rikgipa matburingrangko donram biapo donani ong·achim.
Mowa-ni aganani gitade, matburirangko donna rikgipa biapona uamang re·anggipa October 4, 2025 tariko re·angahachim indiba mangsni matchurangkosan nikbaiachim.
Unigimin ia maini gimin indake on·enga, uarangko sandirokchina gita Mowa dabiaha.
