TURA: Batanggimin ru·uta bilsirangonin West Garo Hills-ni bang·a dingtang dingtang jolrango niamgri itta so·aniko nikna man·engon, iako champengna gita authorities maini gimin mamingkon ja·ku de·jaenga ine sing·anirang nadoaha.
Rajabala aro Phulbari constituency-oni ning·o ga·akgipa songrangon maming lekka ba nanggipa lekka donggija niamgri itta taria ba so·aniko kobor man·aha. Gital itta so·gipa biaprang gimikan bangla bhata rokomni ong·a indake itta so·anichi wal·ku ong·katgipa balwa rongtalgijagipako rang·sitna nange joloni manderangna neng·nikani ong·enga.
“Niamgri itta so·gipa biaprang bang·batan mongsonggipa rama jolni sepango ong·a, iani kride Garo Hills Authorities District Council (GHADC), a·dokni forest department aro gipin authority-rang iani gimin u·ia, indiba batanggimin ru·uta somoirangonin niamgri itta so·a ba tarianirangko nikgenchimoba authority, iako champengna maming ja·kuko de·a dongja, dos dakgiparangni kosako sandie ja·ku de·a dongja ine Rajabala-oni saksa aganaha.
Koborni gita Nayagaon, Gomaijhora, Rajpur aro Rajabala constituency-oni gipin songrango dam 25 niamgri itta tarie so·aniko nikna man·aha. Phulbari-ni Chibinang-ni ning·o ga·akgipa songrangoba bang·e nakataha. Ia janapgipa songrangara bangbanggipa biaprang ong·ja manderangni songdonggipa biaprangsa ong·a, jeni a·sel sepangjolo donggiparangni an·seng-baljokanina namen kenbegnigipa ong·a.
Niamgri itta bhatako chalaigiparang bang·batan koela dongjani a·sel bolchi so·enga, jeni a·sel sepangjolo donggipa buring bolgrimko bon·atenga. Ittako so·na gita truk garirango gape gape bolrangko salenga.
Batanggimin bilsi gni somoirangonin jolni manderang district administration, GHADC, State Forest aro Meghalaya State Pollultion Control Board (MSPCB)-na changni chang badi ka·doahachim. Indiomangba mamlako dal·e ra·a dongja.
“Iarangni gisepon MSPCB, changni chang badi ka·doaniko man·e niamgri itta bata chalaigiparangko am·sandina gita team-ko watatahachim. Niamgri kam ka·giparangna notice-koba on·ahachim indiba maming namgni dongja, kenani grian business-ko chalaikua ine Phulbari-oni saksa aganskaha.
Ia bilsioba apsan dake a·bachengtaiengjok, niamgri itta so·na gita tariengjok, ta·raken iarangko so·gnok. Ru·uta bilsirangonin iandakgipa kamrangko nikbaenga, skangode bang·gijasan dongachim da·ode itta so·ani karkana dakpilengjok. Rajabala-oni Tikrikilla-ona sokangpilaha.
“Indiomangba authority maina jrip dongenga, mikkangchi administration iako champengna kamko ka·angja ong·ode chinga court-ona re·angen uasan cholko nikataijok ine songoni manderang aganaha.
