TURA: A·dokni dingtang dingtang sorkari department-rango Muster Roll (MR)-ni kamko ka·enggiparang mongsongbate, Public Health Engineering (PHE), Water Resources (WR) aro Horticulture department-o Muster Roll-ni kamko ka·enggiparangna, jagittamni dormahako July 31 tarikni gisepo on·jagenchimode, re·baenggipa August 3 tarik dipet, Shillong aro Tura-o jingjengatanirangko dakanggen ine All Meghalaya Muster Roll Workers’ Union (AMMRPWU), mikrakataniko on·angaha.
Iani bidingo, AMMRPWU-ni tom·aniko re·anggipa July-ni 20 aro 25 tarikrango tom·aniko Shillong aro Tura-o ong·atangenba, Muster Roll worker-rangna July 31 tarikni gisepon jagittamni dormahako on·jagenchimode August 3 tarik dipet jingjengatna tik ka·angaha.
AMMRPWU-ni u·iatani gitade, re·anggipa July-ni 10 tarikon union-ni dilgiparang, PHE department-ni Chief Engineer (CE) aro Commissioner Secretary-ko Shillong-o gronge, Muster Roll-rangni man·na nangenggipa jagittamni dormaharangko on·china mol·molaha aro MR worker-rangna April, May aro June jagittamni dormahako July jani gisepon on·na gita PHE-ni Chief Engineer-ba ku·rachakaniko on·ahachim.
Indake ong·genchimoba da·o July ja bon·na sipilengahaoba MR worker-rangna jagittamni dormahako on·kujaengani gimin union-ni dilgiparang, July-ni 20 tariko, PHE-ni official-rangna sedoatenba, July 31 tarikni gisepo jagittamni dormaha baksana April jao bariatgipa jagittamni VDA-ko chu·gimik on·jagenchimode, August 3 tarik dipet, Shillong aro Tura-o jingjengatanggen ine union, mikrakataniko on·angaha.
Sorkarini gipin department-rango MR worker-rangna jaantian dormahako somoi gita on·na man·enga ong·ode maini a·sel PHE, WR aro Horticulture department-rango on·na man·skajaenga ineba union-ni dilgiparang sing·doataha.
Ia department-rango kam ka·enggipa MR worker-rangni dormaha baksana 2025 bilsini November 14 tariko Cabinet-ni ra·chakgimin gita, Group D Post-rango ta·rake senior RCW-rangko gapatchina, bilsi 10 gapgipa MR-rangko ta·rake RCW-o segatchina, MR-rangko Unskilled, Semi-Skilled, Skilled aro Highly-Skilled-o bilsini kri bilsianti ra·dochina aro kamoni neng·takangenggipa MR-rangni palo nokdangni manderangko Muster Roll-o rakkichina gitaba AMMRPWU, sorkario dabiangaha.
