Bangladesh-ni a·kangani ja·panggri
SHILLONG: Salgro-Salaram A·dok, Indiani chu·gimik bakan ong·a ong·a ine BJP Meghalaya Sombaro aganaha aro adita Bangladeshi dilgiparangni ka·mikkenatenggipa a·selrangni bidingo A·dok Sorkarinaba BJP, see-jote on·aha ineba a·kange aganaha.
Batanggimin somoio Bangladesh-ni adita dilgiparangni, Indiani Salgro-Salaram A·dokko ra·na gita ka·mikkenatani kattarangko ku·jokgipani bidingo BJP, A·doko Sorkarina janape seataha ine party parakaha.
Bangladesh-ni adita dilgiparangni ku·watgipa kattarangko BJP nengrae ra·ja, aro iani gimin chinga A·dok Sorkarina seataha, mongsongbate je constituency-rangan Indo-Bangladesh sima-arirango ong·engachim, uarangona Bangladesh-ni manderangni napdrabaaniko champengna gita rakgipa ja·kurangko de·china chinga sorkarina seataha ine Meghalaya BJP-ni general secretary, Wankitbok Pohshna aganbaha.
Pohshna indineba aganaha je, Salgro-Salaram A·dok chu·gimikan Indiani bakan, aro iako an·tangtangchi chapatna Bangladesh-ni manderangni a·kanganide pangchakani gri, ua aganaha.
Ma·mongo, BJP-an sason ka·engani gimin, a·paloni ka·mikkenatanirangko warachakna Sorkari bilakgipa cholrang donga aro sima ario silchek kadulanirangko ta·rakbatatenga ine Phoshna a·kange aganaha.
