AMPATI: South West Garo Hills a·jani Salmanpara jolo gulirangko dongnue donenga ine koborrangko man·soani ja·man Mongolbar salo, Salmanpara aro Ampati Police Station-ni police-rang, Salmanpara Police Station-ni ning·o donggipa Santogre songona re·ange, ia songni samba jolo donggipa wa·griponiko adita gulirangko man·aha.
South West Garo Hills a·jani Superintendent of Police (SP) Vikash Varma-ni u·iatani gitade, Santogre song samba jolo, silchidare aro gulirangko dongnue donenga ine koborko man·soani ja·man police-rang, ia songni samba jolo donggipa wa·griponiko am·sandienba, aircraft ba sildorengrangko gona jakkalgipa silchidareni rong 55 gulirangko man·aha.
Ia gulirangko jakgitelgipa sakkirangni mikkangon police-rang rim·e ra·baaha aro ia gulirangni bidingo talbate ma·sina gita police-rang sandirokaniko dakkuenga ineba SP parakataha.
Iandakgipa manderangni gimin ba kamrangni gimin koborrangko man·genchimode sepangbatgipa police station-ona u·iatchina gitaba SP didiataha.
“Kobor on·timgiparangni bimingko chinga darangnaba parakjawa aro uamangna boksisrangko on·gen,” ine Varma parakataha.
