WILLIAMNAGAR: East Garo Hills a·jani Williamnagar constituency ning·o donggipa dingtang dingtang song aro gittimrangna Mongolbar salo, Dawa Gittinggre Damsing Youth Club, Songkritan chroksusaaniko skanggipa changna Dawa Gittinggre kal·chakramo ong·atangaha.
Ia songkritan chroksusaanio, Chekwegre dol chegipa ong·e, gong 25,000 tangkako boksis dake man·angaha, Rongongre dol gnigipa ong·e, gong 15,000-ko man·aha aro Cherangre dol, gittamgipa ong·e, gong 10,000 tangkako boksis dake man·angskaaha.
Ia songkritan chroksusaanio bak ra·gipa gipin dolrangnaba, Williamnagar-ni MLA aro a·dokni Cabinet Minister Marcuise N Marak, consolation prize gita dolpraknan gong 5000/- ka·e tangkako sualataha.
Ia songkritan susaaniko ong·atanio, Williamnagar-ni MLA, jinmana aganprakengon, Williamnagar jolrango donggipa manderangko didina aro skie ra·china gita gipin biaprangonikoba chrokgiparangko okamatgen ine parakataha.
Chengo A·chikrang jekai Krismas aro Gital Bilsiko manianio songkritan ring·ani aro chrokanirangko dakachim, mikkangchiba ia daka rikaniko gimaatjachina aro gital chasongni chadamberangnaba skie on·angkuchina gita Marak didiangaha.
Ia songkritan chroksusaaniko ong·atanio, Williamnagar constituency-ni ning·o donggipa dam 12 songni chrokgipa dolrang bak ra·angaha.
