SHILLONG: Bharatiya Janata Party (BJP) sorkarini Viksit Bharat – Guarantee for Rozgar & Ajeevika Mission (Gramin) (VB-G-RAM G) Act 2025-ko jegalna gita Meghalaya a·dokni Congress dol, a·doko aro a·songni dingtang dingtang biaprango jingjengatanirangko dakna tik ka·angaha.
BJP sorkarini kosako jegalatengon, ia Act ba niamoniko Mahatma Gandhi-ko den·galna miksongesa MGNREGA ba Mahatma Gandhi National Rural Employment Guarantee Act-ko VB-G-RAM G ine mingsrena tik ka·aha ine Congress dol matnangataha.
Iani bidingo kobor ra·timgipa manderang baksa agangrikengon, ia Act-ko pass ka·ani gimin BJP-ni kamko jinmana mesokchina gita All India Congress Committee (AICC), pilak a·dokni Congress Committee-rangnan ge·etaniko on·aha ine Bristibar salo, Meghalaya Pradesh Congress Committee (MPCC)-ni president Vincent Pala parakataha.
Knal January-ni 10 tariko district level press conference-rangko Congress dol ong·atenga aro ia Act-ni ning·o BJP sorkarini namgijagipa miksonganirangko Congress dolni dilgiparang, media-na talate on·anggen ineba Pala parakataha.
Iani ja·man February jao ia gital bimingko jegale, Congress dolni membor-rang, okumu chake jingjengataniko dakanggen aro iana permission-rangko ra·engaha ineba Pala aganaha.
Ia Act-ko pass ka·anina BJP-ko jegalatengon, ia Act-ni ning·o manderang dabiani bilrang dongjawaha aro ia niamko Meghalaya a·dokni BJP president-de poraien nikuja ine MPCC-ni president matnangataha.
“Ia niamara da·o BJP sorkarini skani gitasa ong·aha aro manderang, ma·mong sorkarini kam on·aniosa pangchakna nangaignok,” ine Pala aganenba, BJP-ni membor-rang, Mahatma Gandhi-ni bimingko namnikjaesa ia Act-oniko uni bimingko den·galna nangniktokenga ine parakataha.
Ia program-na gong kror 90,000-ko nangengon, 2025 bilsio ma·mong sorkari ia program-na gong kror 60,000-kosan chamaiaha ineba MPCC president matnangataha.
Ia Act-ni namgniko man·giparangara bang·batan me·chikrangsa ong·achim ine janapatengon, ia gital Act-o BJP sorkari, me·chikrangkode nichanggale, jillani manderangsa mikkang nitebatskaaha ine Pala matnangataha.
