TURA: Adita salrangna skang, West Garo Hills a·jani Rajabala jolo donggipa Goalgaon songo, ACHIK dolni membor Dilseng M Sangma-ko so·otani bidingo sandirokna gita West Garo Hills a·jani Police-rang, Special Investigation Team (SIT)-ko songaha.
Iani bidingo u·iataniko on·atengon, Goalgaon songo ACHIK dolni membor saksako so·otanio jak donggipa manderangko sandina, Dadenggre-ni Sub-Divisional Police Officer (SDPO) RA Sangma-ni dilanichi SIT-ko songaha aro ia a·selo jak donggipa manderangni bidingo saoba koborrang man·genchimode, 7005680094 nombor-ona u·iatna man·gen ine West Garo Hills a·jani Superintendent of Police (SP) Abraham T Sangma parakataha.
“Da·o dipet ia a·selo jak donggipa sakchet manderangko police-rang rim·na man·aha aro ia a·selo jak donggipa gipin manderangkoba rim·na police-rang raken kam ka·enga. A·songo on·gimin niamrango pangchake police-rang, ia a·selo jak donggipa pilak manderangkon rim·na jotton ka·gen,” ine West Garo Hills a·jani SP, manderangna ku·rachakaniko on·ataha.
Jangbingbanganirangko bebera·jachina aro tom·tomaniko rakkiangkuchina gitaba SP, Garo Hills-ni manderangko didiataha.
Police-rangni u·iatani gitade, ia a·selo jak donggipa sakchet manderangko da·o dipet rim·na man·aha aro ia manderangara, bilsi 30 ong·gipa Anarul Islam, bilsi 47 ong·gipa Rafiqul Islam, bilsi 40 ong·gipa Atowar Hussain, bilsi 30 ong·gipa Ariful Islam, bilsi 21 ong·gipa Ashadur Sheikh, bilsi 22 ong·gipa Mozidur Hussain, bilsi 33 ong·gipa Mofidur Hussain aro bilsi 22 ong·gipa Mozahidur Rahman ong·a.
