‘ILP gita dakgipa’ niamchi a·dokni manderangko togina man·jawa: Tura MP

SHILLONG: Gital ra·gatgipa Immigration & Foreigners Act-o ‘Inner Line Permit (ILP) gita dakgipa’ niamko ra·gatna sorkari miksongengon, Meghalaya a·dokna ‘ILP gita dakgipa’ niamkode nangja ine Tura-ni Congress MP Saleng A Sangma-ba parakataha.
“ILP gita dakgipa niamni gimin aganengon, na·simang Meghalaya a·dokni manderangko togina man·jawa,” ine Sangma aganaha.
A·dokona niam gri napsrukbaenggipa manderangko champengna gita Meghalaya sorkari, nambata cholrangko sandina nangenga ineba ua aganaha.
Meghalaya Residents Safety & Security Act (MRSSA)-ni bidingo janapatskaengon, ia niamko mangbatatna ba jakkalna gita a·dok sorkari, mamingkon dakjaenga ine Tura MP aganaha.
India a·songni salgro salaram jolko Bangladesh a·songni ra·sekna ka·mikkenatgipa kattarangni gimin janapatskaengon, iandakgipa obostarangnan ua jajrengsoenga ine Sangma aganaha.
“Gipin biaprangoni manderang, Meghalaya a·dokona re·bae, pilak dakgipa kamrangko ka·anan anga jajrengsoa. An·chingo gipin biaprangoni re·bagipa manderangko ma·sina aro banoni re·baenga, uarangko sandina namgipa niam aro cholrangan dongja,” ine Tura MP aganaha.
India a·songni badiaba biaprango gipin a·songrangoni napsrukbagipa manderangko rim·a changantian, ia manderang, Meghalaya aro salgro salaramni gipin biaprang gita re·napbaa inesa a·kangrongaia ine Sangma aganaha.
A·doko niam gri napsrukbae songdong a·chaenggipa manderang bang·engahani giminan ua mikkangchi chadamberangna jajrengchakenga ineba ua aganaha.
Sangma-ni parakatani gitade, niam gri napsrukbae songdongenggipa manderangko Assam a·dokode a·rikgalengaha indiba Meghalaya a·dokode da·onan maming ja·kurangko de·kujaenga.
“An·chingode a·doktangni aro jattangkon gipin dolrangni jako so·otna on·kuenga aro ian namen dukni katta ong·a,” ine Sangma aganaha.
Adita salrangna skang, Rajabala jolo, niam gri chalaienggipa quarry-ko chipatna kam ka·enggipa ACHIK dolni membor saksa Dilseng M Sangma-ko so·otanina an·tangni suk ong·gijaniko parakatengon, maini gimin gipin biaprangoni re·bagipa manderangko a·doko bading chiwale cha·na on·enga ine Tura MP sing·doataha.
Immigration & Foreigners Act-o ILP gita dakgipa niamko ra·gatna sorkarini miksongenganiko Shillong-ni MP Dr Ricky AJ Syngkon-ba jegalataha aro a·dokna ILP-kon ra·gatchina dabiangaha.
ILP-ko man·e on·na gita ku·cholsan ong·e kam ka·china gitaba Syngkon, a·dok sorkariko didiataha.