SHILLONG: National People’s Party (NPP)-ni dilgiparang aro a·dokni manderang, uko kranikgenchimode ua Meghalaya a·dokni Rajya Sabha MP ong·na kusi ong·aigen ine a·dokni gitcham minister aro NPP-na ku·wattimgipa James PK Sangma parakataha.
A·dokni Rajya Sabha MP ong·enggipa WR Kharlukhi-na dongimin somoi re·baenggipa June 21 tarikosa bon·enga aro da·o dipet uni term matchotkujani gimin Rajya Sabha MP-na party-ni gita da·onin chanchisoanide kraani ong·jawa ine ua aganskaaha.
Da·o ong·enggipa Rajya Sabha MP WR Kharlukhi, politics-oni neng·takna sikengaha aro dambekalgipa dilgiparangna wate on·skana sikengani gimin da·o gnigipa changna MP ong·na nangnikjaengaha ine adita salrangna skangsan parakatahachim.
Uni Rajya Sabha MP ong·taina nangnikjaengaha ine parakatani ja·man, Rajya Sabha MP-na NPP, James Sangma-ko ong·jaode uni nogipa aro Tura-ni gitcham Lok Sabha MP Agatha K Sangma-ko mingskanaba gnang ine bang·a manderangan chanchichipanirang ong·kattokahachim.
Rajya Sabha-ni MP-na da·oni chanchisoaniara agre seng·gnangdugakuenga ine janapatengon, Rajya Sabha MP-na bimingko minganide ba seokanide party-ko dilenggiparangni jakosa ong·aia ine Sangma Sangma parakataha.
“Da·o dipetde manderangni gisepo chanchichipanirangsan ong·aiengkua indiba party-ni dilgiparang angna je daitoko on·genchimoba anga kamni kri kragenchimode uko ra·na kusi ong·aigen,” ine Sangma aganaha.
Rajya Sabha MP-na uan krabatgipa candidate ong·enga ine party-ko dilgiparangoni agangipa kattarangna aganchakaniko on·angengon, iana ua mittelpilaniko parakaha.
“Angko kranikgipa manderangko anga mittelpilna ska. Anga an·tangna tikatgimin kamrangko maming saloba jechakgipa ong·ja. Party-ni manderang aro a·dokni manderang angko Meghalaya-ni Rajya Sabha MP ong·na kranikenga ong·ode anga kamko ra·na kusi ong·aigen,” ine Sangma aganaha.
