SHILLONG: A·doktangni daka-rikanirangko ripingna aroba uarango kamrangko ong·katatna man·na gita A·dokna dingtangmancha cultural aro tourism development scheme-rangko on·atchina gita Meghalaya cabinet minister aro BJP MLA Sanbor Shullai, Ma·mongko didiaha.
BJP MLA Sabor Shullai New Delhiona re·angenba, Ma·mongni tourism aro culture minister Gajendra Singh Shekhawat-ko gronge agangrikaha, jeon uamangni agangrikani somoio party-ni gipin a·gipi dilgiparangba dongpaachim.
Koborna parakani gitade, Songsarek Garo culture ba dakbewal-ko man·chape Seng Khasi aro Seng Raid-ni dakbewalrangko ripingna gita cultural scheme-rangko tarie Meghalaya-na on·atchina gita Shullai, Ma·mong sorkariko mol·molaha. Indake Salgro-Salaram a·dokni pilak daka-rikanirangko ripinge donna aro cultural tourism-ko bilakatna gita Shillong songjinmani Mawlai CRPF camp-o damsa cultural heritage traditional market-ko rikchina gita ua de·e mesokaha.
Unagreba, Shullai, an·tangni South Shillong constituency-n tourism development scheme-rangko aro ropeway project-na tangka-paisarangko chamatchina janapaha, jedakode ia project-rango a·jatangni manderangna kamrangko ong·katate on·na man·gen.
Indake Meghalayao maikae a·dokni dakbewal-rikbewalko ripingenba tourism-chi a·dokni economy-ko tang·doatna gita miksonganio Shullai, Ma·mong minister baksa agangrikaha.
