SHILLONG: Right of Way (ROW)-ni bidingo Garo Hills Autonomous District Council (GHADC)-ni gitcham Secretary, ma·sisretaniko on·ani a·selsa Hill Road jolrango songdongenggipa manderangko a·rikgalenga aro nokrangko pe·galenga ine Tura-ni GHADC MDC Bernard N Marak matnangatenba, ia rama jolrango a·rikgalaniko aro nok pe·galaniko dontongchina, North Garo Hills a·jani Deputy Commissioner-ko seachi didiataha.
Marak-ni Deputy Commissioner-na sedoatgipa chittio janapatani gitade, ROW-ni bidingo MCS officer ong·e GHADC-ni gitcham Secretary ong·anggipa, Deputy Commissioner (Revenue)-na ma·sisretaniko on·ani a·selsa, ia rama jolrango songdongenggipa ritchani ritcha nokdangrangna nangchakeaniko ra·baaha. ROW ine a·kangenggipa a·arangko sorkari, ain gita brea dongkujachim ineba Marak parakataha.
Ia Hill Road, jekon National Highway (NH-62) ine manderang ma·sibattoka, ia ramara National Highways Authority of India (NHAI)-ni list-o dongja aro ia ramara GHADC ramasa ong·genchimoba a·dokni PWD-chi chalaiachim ineba Marak parakataha.
2020 bilsini February jao gitcham Secretary-ni on·gipa u·iatanio meligrikgijanirang bang·en donga ineba Tura MDC parakataha.
Marak-ni parakatani gitade, 2020 bilsini February 4 tariko on·atgipa chittiode, biapona re·ange niani ja·mansa ROW-ko ma·sina man·aha ine janapachim indiba apsan bilsini February 6 tariko on·gipa chittiode, ROW-ko rama jangchioni feet 35-ona ong·e ROW-ni niamrango pattarangko tarina man·ja ine janapskaahachim.
“Iandake meligrikgija u·iatanirangchi district administration-kosan ong·aigija kacharikoba dilsretaha aro iani a·sel ritchani ritcha nokdangrang, an·tangtangni janggi tangani cholrangko gimaatna nangaha,” ine Marak parakataha.
Indake ong·engon, iani bidingo name sandirokchenggija aro a·ani tangkarangko gamchenggija, ia ramao songdonggiparangko a·rikgaljachina aro nokrangko pe·e galjachina Marak, North Garo Hills a·jani Deputy Commissioner-ko didiataha.
