TURA: Danakgre A·kingni ning·o mitam manderang, niam gri A·king Nokmani mohorko jakkale, dingtang dingtang gittimrango manderangna nanga lekkarangko tarie on·enga ine Danakgre A·kingni Nokma Enilla Ch Marak, West Garo Hills a·jani Deputy Commissioner-na badi ka·doatenba, A·king Nokmani mohorko skatang jakkalna man·jana gita ge·etaniko on·china didiataha.
Iani bidingo, West Garo Hills a·jani Deputy Commissioner-na badi ka·e sedoatengon, “Danakgre a·kingni ning·o Tura-ni badiaba badiaba gittimrango, mitam manderang, A·king Nokmani mohorko, Nokmana u·iatani gri jakkalenga ine koborko man·soaha. Iandakgipa kamara, cha·bokani aro Nokmarangna on·gimin bilko pe·ani gita ong·a,” ine Danakgre A·kingni Nokma parakatenba, A·king Nokmani seokgimin ba bil on·gimin manderangsan, dingtang dingtang gittimrango Nokmani pal, manderangna lekkarangko tarie on·na man·na gita ge·etaniko on·china Deputy Commissioner-ko didiataha.
A·king Nokma an·tangan dingtang dingtang gittimrangna Nokmarangko seokgen aro iani bidingo Deputy Commissioner-ni officer-na u·iataniko on·anggen ineba A·king Nokma parakataha.
Indake ong·engon, Tura Municipal Board (TMB)-ni bilrangko, Danakgre A·kingni mitam a·arangonaba sokate, ia jolrango songdongenggipa manderangoniko niam gri kajinarangko gile ra·enga ineba A·king Nokma, West Garo Hills a·jani Deputy Commissioner-na badi ka·doataha.
“Uni gimin TMB-ni bilrangko, a·bachengo dongimin biaprangna agre A·kingni a·arango napatjachina anga didienga maina iandakgipa kamara, A·chikrangni dongimin niam aro arini a·palo ong·a,” ine Marak parakataha.
