TURA: Asanang-oni Samanda-ona gital ramako taria namsrangjani a·sel da·o matchota bakan ramarang nosto ong·na a·bachengengaha ine Simsanggre-ni A·chik Organisation for Social Welfare (AOSW), East Garo Hills PWD (Road)-ni Executive Engineer-na badi ka·doatenba, ia ramako tariani bidingo ta·raken sandirokchina didiataha.
AOSW-ni parakatani gitade, ia ramako MIDS Company tariahachim indiba ia ramako namgijagipa bosturangchisa tariahani a·sel aro kamrangko name ka·jahani a·sel da·on ia rama nosto ong·na a·bachengengaha.
“Asanang-oni Samanda-ona (Samanda C&RD Block-ni ning·o donggipa Rangmalgre jolrang) rama taria namsrangja ine chinga nikna man·aha. Ramani rikamrango ro·ongrangni tang·srisraaniko nikna man·engaha aro rama kosako prakbaenganikoba nikna man·engaha. Ia rama da·on nosto ong·na a·bachengengahani gimin ian re·ruragipa manderangna kenchakna nanganiko ong·atenga,” ine AOSW-ni dilgiparang, PWD (Roads)-ni Executive Engineer-na sedoatgipa chittio parakataha.
Iandakgipa kamrangara, rama tarianio niamrangko ja·rikgijaniko mesokasan ong·aija indiba ramako re·ruraenggipa manderangni janggirangnaba kenchakna nanganiko ra·baenga ine janapatengon, ia ramako ta·raken re·ange niechina aro kam ka·gipa contractor-ni kosako rakgipa ja·kurangko de·china gita AOSW, PWD (Roads) official-ko didiataha.
