Cabinet-o ong·jaoba manderangna dangdike on·angkuna ku·rachaka
SHILLONG: A·doko sorkariko dilenggipa National People’s Party (NPP)-ni gisepo meligrikjaenga ine jangbingbanganirangko Bristibar salo, a·dokni gitcham Cabinet Minister aro NPP-ni dilgipa Ampareen Lyngdoh jegalataha aro ua an·tangba party-ko wate katna miksonganirang dongja ine talataniko on·angaha.
Uni politics-ni kamrangko ka·anio uo maming jajaanirang dongja ine talataniko on·angengon, ua pangnan kamrangko parakesa ka·a aro manderangna talatanirangko on·a ine Lyngdoh aganaha.
Uni mongsonggipa kamrangko ua maming saloba, an·tangni manderang baksa agangrikchenggijade ka·jawa ineba ua aganaha.
NPP-ni gisepo meligrikgijanirang donga ine chanchichipe agananirangna aganchakaniko on·angengon, iandake chanchichipanirangara kakket ong·ja ine Lyngdoh parakataha.
Cabinet-o ka·rimskarang baksa agangrikanio uni ma·siani gitade ian sorkariko chalaianio neng·nikanirangko mesokanisan ong·aia indiba bilgrie nikanide ong·ja ineba Lyngdoh aganaha.
A·dokni cabinet-o uni dongpajani gimin sing·anirangna aganchakaniko on·angskaengon, uni iandakgipa gadangrangde, uni mande ong·e janggi tanganio mongsonggipa bak ong·ja ine Lyngdoh parakataha.
An·tangni politics-ni gita kam ka·anirangko janapatengon, 1972 bilsio a·dokko man·chengaonin dingtang dingtang dilgiparang, party ge·saoni ge·saona katjojoani ranta dongbaaha indiba ua an·tangde iandakgipa kamoni naljokna miksongengaha ine Lyngdoh parakataha.
Uni mongsonggipa daitode, an·tangni ka·enggipa kamrangko matchotatani aro constituency-tangni manderangna ku·rachakanirangko chu·sokatanian ong·a ine janapatskaengon, cabinet-o ong·jagenchimoba ua kamtangko ka·na gisik nangaia ine Lyngdoh aganaha.
Manderangni seokako man·e dilenggipa manderangko pangnan an·tangtangni ku·mikchetanirangna kakket ong·china gitaba ua didiataha.
