SHILLONG: 2019 bilsio Meghalaya Legislative Assembly-ni Inner Line Permit (ILP)-ko dabina pass ka·gimin resolution-ko ma·mong aro a·dok sorkarirang, ‘sigimin chitti’ gita ong·ataha ine Khasi Students Union (KSU) matnangatgenba, a·doko ILP-ko ra·gatna gita gital dake Assembly-o resolution-ko ra·piltaichina dabiangaha.
KSU-ni general executive council (GEC) tom·aniko ong·atani ja·man KSU-ni president Lambokstarwell Marngar, kobor ra·timgipa manderang baksa agangrikengon, ILP-ko ra·gatchina dabie 2019 bilsio Meghalaya Legislative Assembly-ni pass ka·gipa resolution-ni bidingo India sorkari maming ja·kurangko de·jaenga ong·ode, a·dokni dilgiparang Assembly-ona re·angpiltaie, resolution-ko ra·taipilna nanga ine aganaha.
“ILP-na Assembly-ni ra·gipa resolution-ko India sorkari donchipaienga ong·ode aro ILP-ko nangnikmanchaenga ong·ode a·dok sorkari, Meghalaya a·doko ILP-ko ra·gatchina dabie, resolution-ko ra·piltaina nanga,” ine ua aganaha.
Apsan daken Voice of the People’s Party (VPP)-ba, 2019 bilsio Assembly-ni pass ka·gipa resolution-ni bidingo a·dok aro ma·mong sorkarirang gisik nangjaenga ine matnangatahachim.
A·doko ra·gatgipa Immigrants & Foreigners Act (I&FA) aro Meghalaya Residents Safety & Security Act (MRSSA) gita dakgipa niamrangkode Inner Line Permit (ILP) baksa apsan dake ra·na ba tosuna man·jawa aro ia pilak niamrangan dingtang dingtang miksonganirang donga ine VPP-ni president Ardent M Basaiawmoit aganaha.
Meghalaya a·doko ILP-ko ra·gatchina dabianio chakpaaniko on·na gita Meghalaya Assembly, 2019 bilsini December jaon resolution-ko pass ka·ahachim indiba da·alonan ILP-ko on·ani bidingo ma·mong sorkarioni maming aganchakanirangko on·skakujaengachim.
