Ia a·selna NGO-rang, rama tarigipa contractor-rangko matnanga
DAINADUBI: Re·anggipa Sonibar attamo, Dainadubi-oni Darugre-ona dakanggipa National Highway (NH-127) ramao gital tarienggipa culvert a·kolo, chadambe saksa scooty a·sel ong·e janggitangko gimaatna nangaha ine police-rang u·iataha.
Police-rangni u·iatani gitade, ia chadambeara, North Garo Hills a·jani Mendipathar police station ning·o donggipa Pangsudam songoni Nejubirth D Sangma ong·achim aro ua Sonibar attamni 6:20 bajimango, ia ramako re·angengmitingo, gital tarienggipa culvert-o a·kol dongako nikjae, a·sel ong·aha.
A·sel ong·ani somoio ia chadambe, helmet ganjachim aro uandaken ua a·sel ong·anio uni skorango bilongbee mata bu·anirangko man·e, ja·mano siangna nangaha ineba police-rang u·iataha.
Ia chadambe, helmet ganjani a·sel aro andalani gimin rama nikjaesa a·sel ong·e sina nangaha ine police-rang a·kangengon, rama tarigipa contractor aro company-ni simsakjani a·selsa ia chadambe, a·sel ong·aniko chagrongna nangaha aro janggitangko gimaatna nangaha ine Dainadubi-ni NGCO aro dingtang dingtang dolrang matnangataha.
NGO-rangni matnangatani gitade, ia gital tarienggipa culvert-o maming chinrangko donjani a·selsa aro ia a·kolko peng·e donjani a·selsa, ia chadame an·tangni scooty baksa a·kolo ga·aksrue a·sel ong·na nangaha aro an·tangni janggiko gimaatna nangaha.
“Ia rama gimikon, ia ramako tarienggipa company, maming chinrangkon donja aro iani a·selsa ia chadambe, a·kolko nikjae ga·aksrukna nangaha. Ian uamangni simsakjani a·selsa ong·aha aro ia a·selna uamangni kosako rakgipa ja·kurangko de·na nanga,” ine Dainadubi-ni saksa dilgipa Chengchang Marak parakataha.
NGO-rangni u·iatani gitade, ia apsan attamon, ia apsan biapon gari bolgipinba a·sel ong·aniko chagrongna nangaha.
Sonibar walni 8:00 bajimangoba gari bolgipin, ia apsan biapon a·sel ong·aniko chagrongna nangaha indiba ia manderang, rasong gnangbee bang·gijasan saknaanirangko man·aiaha ine NGO-rang parakataha.
Tura-ni MDC Bernard Marak-ba ia a·sel ong·ani bidingo an·tangni suk ong·gijaniko parakataha aro iandakgipa a·selrangko champengna chel·chakanirangko dakengama ine sing·doataha.
“Dainadubi-o gital tarienggipa culvert-na cho·gimin a·kolko peng·e donjani a·sel chadambe saksa janggitangko gimaatna nangaha. Ramarango iandakgipa a·sel ong·anirangko champengna simsak nirokanirangko dakengama?” ine Marak sing·doataha.
